Առաջիկա ընտրությունների միակ հարցը՝ ո՞ւմ հետ ես դու
ՎԵՐԼՈՒԾՈՒԹՅՈՒՆՆԵՐ
Հասարակության մի շերտ կա, որը ո՛չ նախկինում, ո՛չ էլ հիմա չի հասկանում, թե ինչ նշանակություն ուներ Արցախը Հայաստանի համար: Մարդկանց այդ տեսակն Արցախը միշտ դիտարկել է բեռ, վայր, որտեղ ծառայություն են անցնում Հայաստանից գնացած զինծառայողներ: Մարդկանց այդ տեսակը իր կյանքի գրեթե բոլոր դժբախտությունների պատճառը համարել է Արցախի չկարգավորված խնդիրը: Հիմա, որ նրան բացատրես, որ եթե չկա Արցախ, ապա կարող է չլինել նաև Հայաստան, որ թուրքը եկել հասել է Սյունիքի դարպասներին, որ 100-150 հազար տոննա ցորեն էր մատակարարվում Արցախից Հայաստանին, որ 100-ից ավելի ՀԷԿ-եր էին աշխատում Արցախում, որոնք էլեկտրաէներգիա էին ապահովում և այլն, և վերջապես Արցախը մեր պատմական հայրենիքն է, որտեղ դեռևս 5-րդ դարում կառուցված եկեղեցիներ կան, միևնույն է մարդկանց այս տեսակը դա չի հասկանում: Նաև չի հասկանալու, երբ չլինի Սյունիքը, Տավուշը, նույնիսկ Երևանի կեսը: Միևնույն է՝ այն մյուս կեսում նա հանգիստ սուրճ կխմի, սպասելով, թե երբ է Բայրաքթարը հայտնվելու իր գլխավերևում: Եվ դժբախտությունն այն է, որ այս մարդիկ են Նիկոլ Փաշինյանի ընտրազանգվածը: Այս մարդիկ նայում են Նիկոլին ու իրենց արտացոլումն են տեսնում: Մի առիթով ասել եմ, հիմա էլ կրկնեմ՝ Նիկոլը մեր ժողովրդի մի մեծ մասի հավաքական արատների, մտածելակերպի, աշխարհընկալման մարմնացումն է: Դա է պատճառը, որ եթե վաղը պարզվի, որ Նիկոլը հանձնում է նաև Երևանը, ապա նրան պաշտպանողներ և այդ քայլը արդարացնողներ անպայմանորեն կգտնվեն: Այս մարդկանց ինտելեկտի վրա ազդելով է իշխանության եկել և այն պահում Նիկոլ Փաշինյանը:
Ի դեպ, պետք է նաև արձանագրենք, որ 2018թ-ին տասնյակ հազարավոր քաղաքացիներ քվեարկել են Նիկոլի օգտին, որովհետև անկեղծ հավատացել են նրա ստերին, ցանկացել են, որ երկրում փոփոխություններ տեղի ունենան: Ակնհայտ է, որ այդ մարդիկ եկող ընտրություններում չեն քվեարկելու երկիրը կոլապսի ենթարկած այդ մարդու օգտին: Մնում է հասկանալ՝ ովքեր են և որքան են Նիկոլ Փաշինյանին սատարող մարդիկ: Արդյո՞ք նրանք այնքան շատ են, որ ընտրություններում նրանց քվեն բավարար կլինի Նիկոլի իշխանության վերարտադրման համար: Վստահ եմ, որ ոչ: Բայց խնդիրն այն է, որ մենք որպես ազգ, որպես էթնոս պետք է մեր հասարակության այդ հատվածի մտածելակերպն ու արժեքները ինչ-որ ժամանակահատվածում փոխենք, հակառակ դեպքում մի օր կգա մեկ ուրիշ Նիկոլ ու մենք վերջնականապես կկորցնենք մեր հայրենքը, պետականությունը:
Ցավալի է, բայց պետք է արձանագրենք, որ թուրքի հետ առևտրի տենչող այս շերտը, որի համար առաջնային է գրպանում փող լինելը, իսկ ստամոքսում սնունդ, չի էլ պատկերացնում, որ կարճ ժամանակ հետո թուրքական կապիտալը կգրավի ողջ երկիրը՝ իրեն դարձնելով թուրքական տնտեսական էքսպանսիայի զոհը:
Նայեք՝ հարևան Վրաստանում ինչ է տեղի ունենում: Վրացիները իրենց երկրում բողոքում են թուրքական տնտեսական զավթողականությունից, որը մի քանի տարի հետո սահուն անցում է կատարելու այդ երկրի՝ թուրքական լծի տակ ընկնելու փայլուն կոմբինացիայի: Նիկոլն ու իր թիմը քարոզում են թրքասիրություն, քիրվայություն ու ոչ պատահական, ու ոչ առանց հասկանալու: Նրանք շատ լավ են հասկանում, թե ինչ են անում: Առաջիկայում ընտրություններ են ու հիմնական հարցը հետևյալն է՝ կամ դու Նիկոլի հետ ես՝ հայրենիքիդ ու պետականության կորստի հեռանկարով, կամ տրամաբանորեն հակառակը:
Անի Առաքելյան
