Ծանոթ ու միաժամանակ անհայտ` ավտոմեքենա Aston Martin DB9
ՀԱՍԱՐԱԿՈՒԹՅՈՒՆ
Aston Martin DB9-ը հայեցակարգային մեքենա է, որն ի սկզբանե պատկերացվել է որպես հետագա մի շարք սերունդների հիմնադիր: Դրա նախագծման և ստեղծման ընթացքում ակտիվորեն օգտագործվել են տիեզերական տեխնոլոգիաների ոլորտի վերջին ձեռքբերումները, լավագույն նյութերը և նորարարկանդիզայնը: Այս ամենը հնարավորություն է տվել ստեղծել գերմաքուր անգլիական սպորտային մեքենա, որը հարմարավետության տեսանկյունից GT մակարդակի վրա է:
Aston Martin DB9–ի պատմությունը սկսվել է 2000 թվականին, երբ Ուլրիխ Բեցը ստանձնել է Aston Martin ընկերության ղեկավարությունը: Այն ժամանակ նրան արմատապես նոր ռազմավարություն էր պետք: Դրա համար Բեցը ներկայացրել է հետևի տանող անվով բազմաֆունկցիոնալ հենք, որի հիման վրա կարելի է միաժամանակ արտադրել մի քանի տարբեր մոդելներ: Այդ գաղափարի հիմքում ընկած է եղել տարածական ալյումինե շրջանակը, որի հիմնական առանձնահատկությունը ցանկալի չափին համապատասխանելու կարողությունն է: Դրա շնորհիվ հնարավոր է դարձել փոխել հավաքվող մոդելների չափերը: Բացի այդ, մեծ ուշադրություն է դարձվել մեքենայի մնացած բաղադրիչների միավորմանը:
Հենքը անվանվել է VH (Ուղղահայաց /Հորիզոնական) պլատֆորմ: Ուղղահայաց բաղադրիչը նշանակել է, որ Aston Martin մոդելները կարող են տարբեր լինել բարձրությամբ, իսկ հորիզոնականը որոշվել է Ford Motor Company-ին պատկանող ընկերությունների տեխնիկական ներուժի ներգրավումը: Մեկ տարի անց մեքենան պատրաստ է եղել, բայց որպես գլխավոր կոնստրուկտոր Յան Կալումի փոխարեն Հենրիկ Ֆիսկերի նշանակումը հետաձգել է այդ թողարկումը: Ֆիսքերի ղեկավարությամբ կոնստրուկտորները ստիպված փոխել են գրեթե ամբողջությամբ ավարտված DB9-ի թափքը այն ավելի քիչ ագրեսիվ դարձնելու նպատակով:
«Հորիզոնական ինտեգրման» շրջանակներում Volvo-ի ինժեներներն են ձեռնարկել ավտոմեքենայի պասիվ անվտանգության ու աերոդինամիկայի հաշվարկման աշխատանքները: Նրանք կարողացել են օպտիմալացնել օդային հոսքերի բաշխումը և նվազեցնել բարձր արագության դեպքում ավտոմեքենայի վրա ազդող բարձրացնող ուժը: Ինժեներները փոփոխել են նաև հենքի առջևում տեղադրված տարրերի պարամետրերը, որոնք իրենց վրա են վերցնում ճակատային բախման բեռը: Aston Martin DB9-ը հագեցվել է վեց լիտրանոց V-աձև Ford շարժիչով, որի հզորությունը 450 ձիաուժ է: Մեքենան զարգացրել է 100 կմ/ժամ արագություն 4,7 վայրկյանում: Նաև DB9-ի վրա արգելակներն են ուժեղացվել: Միաժամանակ մեքենայի վրա տեղադրվել են կայունացուցիչներ (ABS, DSC) և արտակարգ արգելակման համակարգ (EBA):
Տիեզերական տեխնոլոգիաների օգտագործման շնորհիվ հնարավոր է դարձել նվազեցնել մեքենայի քաշը և բարձրացնել թափքի կոշտությունը: Դա ձեռք է բերվել հենքը ալյումինի և մագնեզիումի համաձուլվածքներից պատրաստելու շնորհիվ, և միևնույն փոխանակիչ լիսեռը երկաթից ածխածնայինով փոխարինելով: Բնականաբար, այս դասի մեքենան պետք է ունենար համապատասխան սարքավորումներ: Ներքին ձևավորման մեջ գերակշռել է կաշին ալյումինե կամ փայտե ներդիրներով: Այդ ամենը եղել է միայն ձեռքի աշխատանք: Հաշվարկված է, որ մեկ ավտոմեքենայի վրա ծախսվում է մինչև յոթ տավարի կաշի, որոնք հատուկ բերվում են Սկանդինավիայից: Ղեկը սովորաբար սև է ՝ անկախ ներքին հարդարման գունային սխեմաներից: Կենտրոնական վահանակը կարող է պատված լինել հղկված մետաղով, ածխածնային մանրաթելովկամ սև լաքապատ փայտով: Վահանակում տեղադրված են երկու լայն LCD էկրաններ: Aston Martin DB9-ի վարորդի նստատեղը ապահոված է ցածր նստատեղով: Այն, ինչպես ուղևորինը, շատ հարմարավետ է և հագեցած է ճշգրտումների էլեկտրական շարժիչով: Դռների դիզայնը իրականացված է` ըստ կարապի թևի սկզբունքի. բացվելիս դրանք տեղափոխվում են կողք և բարձրանում վեր:
2003 թվականի Ֆրանկֆուրտի ավտոսրահում տեղի է ունեցել Aston Martin DB9-ի առաջին հայտնությունը կուպե տարբերակով: 2008 թվակիանին Aston Martin-ը ներկայացրել է նորացված DB9-ը: Շարժիչին ավելացվել է 20 ձիաուժ և այն հասել է 470 ձիաուժի: Մեքենայի արտաքին մասը փոքր-ինչ փոխվել է. թարմացվել են կողային հայելիները, ռադիատորի ցանցը, անիվի սկավառակները և այլն:
Նյութը հրապարակման պատրաստեց Կամո Խաչիկյանը
