Որտե՞ղ է ծառայում Անդրանիկ Քոչարյանի որդին

168.am-ի  հավաստի տեղեկություններով՝ ՀՀ պաշտպանության նախարար  Վաղարշակ  Հարությունյանը կատարել է իր մտերիմ Անդրանիկ Քոչարյանի խնդրանքը, և նրա որդին՝ Վազգեն Քոչարյանը, շատ հանգիստ տեղում է շարունակում ծառայությունը՝ Վանաձորում:

Հիշեցնենք, որ դեռևս անցած տարի, երբ դեռ պաշտպանության նախարարը Դավիթ Տոնոյանն էր, իսկ ԱԺ անվտանգության և պաշտպանության հարցերի մշտական հանձնաժողովի նախագահ Անդրանիկ Քոչարյանը սկսել էր նրա դեմ «աղմկել», պարզվեց՝ պատճառն այն է, որ նախարարությունը մերժել էր որդուն բանակից ազատելու՝ Անդրանիկ Քոչարյանի առաջարկը:

Դրանից հետո Անդրանիկ Քոչարյանը ևս մեկ մերժում է ստանում. Լուսակերտում ուսումնական փուլի ավարտից հետո նրա որդին՝ Վազգեն Քոչարյանը, պետք է զորակոչվեր Արցախ, և իշխանական պատգամավորը ՊՆ-ում փորձել է համոզել, որ իր որդու այնտեղ գտնվելն անվտանգ չէ, և պետք է չեղարկել նրա Արցախում ծառայությունը և այն կազմակերպել երևանամերձ զորամասերից մեկում:

Նշենք, որ «Դեժավյու» տելեգրամյան ալիքը գրել էր, որ Անդրանիկ Քոչարյանի որդուն՝ Վազգեն Քոչարյանին, պատերազմի ժամանակ առնվազն 2 անգամ զորամասից հանել տարել են այլ տեղ, որևէ այլ զինծառայողի տեղաշարժ չի եղել: Իսկ տարհանումը կազմակերպել է ՌՈ պետի տեղակալ Արամ Բաղդասարյանը:

168.am-ը վերը նշված հարցերի առնչությամբ պաշտոնական պարզաբանում   ստանալու նպատակով հարցում է ուղարկել ՀՀ պաշտպանության նախարարություն՝ նախարար Վաղարշակ Հարությունյանի անունով: Այն ստանալուն պես՝ կհրապարակենք: