2018 թ.-ի շարժումը իրոք հակաղարաբաղյան էր. Ստեփան Դանիելյան
ՔԱՂԱՔԱԿԱՆՈՒԹՅՈՒՆ
Սերժ Սարգսյանն իր վերջին հարցազրույցում հայտարարել է, որ 2018-ին տեղի ունեցածը հակաղարաբաղյան շարժում էր, և որ ինքը իշխանությունը փոխանցել է ոչ թե Նիկոլ Փաշինյանին այլ՝ Կարեն Կարապետյանին: Այս թեմայով 1or.am կայքը զրուցել է քաղաքագետ Ստեփան Դանիելյանի հետ։
— Պարոն Դանիելյան ինչպես եք գնահատում Սերժ Սարգսյանի այս հայտարարությունները, և արդյոք սա պատասխանատվությունից խուսափելու քայլ էր՝ երրորդ նախագահի կողմից։
— Երրորդ նախագահի խոսքերը պատասխանատվությունից խուսափելու քայլ է, թե ոչ դա չեմ ցանկանում գնահատել։ Այլ հարց է այն հայտարարությունը, որ 2018 թվականի շարժումը հակաղարաբաղյան շարժում էր թե ոչ, ապա ես կարծում եմ, որ 2018 թվականի շարժումը իրոք հակաղարաբաղյան շարժում էր և այդ շարժման մասնակիցների կորիզը տարիներ ի վեր հենց նման գաղափարախոսությամբ է հանդես եկել։ Ինչպես նաև այդ շարժման ղեկավարը, որը այսօր վարչապետ է, նա մշտապես նման տեսակետներ է հայտնել և նաև շատ-շատերը, ովքեր շարժման հիմքում էին գտնվում, այդ տեսակետները կրողն են դարձել և ընտրվել են հիմնականում այն մարդիկ, ովքեր պատգամավոր են դարձել հիմնականում այդ տեսակետներն են կրել։ Հիմա այդ մարդիկ ինքնուրույն են հավաքվել, թե իրենց ինչ-որ արտաքին ուժեր են հավաքել այդ նպատակի համար դա արդեն ժամանակի ընթացքում կպարզվի։ Այս առումով ես Սերժ Սարգսյանի տեսակետը կիսում եմ։
—Սերժ Սարգսյանը հայտարարում է, որ բանակցել է 5+2 սկզբունքով տարածքները վերադարձնելու շուրջ, մինչդեռ ՀՀԿ-ն տասնյակ տարիներ հայտարարում էր, թե ոչ մի թիզ հող չեն զիջելու: Ինչպե՞ս եք գնահատում այս հայտարարությունը:
— Ընդհանրապես այդ հայտարարությունը անհեթեթություն է, որովհետև բոլոր բանակցությունների հիմքում եղել են մադրիդյան սկզբունքները և մադրիդյան սկզբունքները գաղտնիք չեն եղել, բոլորի համար պարզ է եղել և քննարկվել է տարածքների զիջումը կարգավիճակի դիմաց, այսինքն այստեղ որևէ նորություն չի ասվել, դա ակնհայտ փաստ է և այդ փաստը ինչ-որ նորություն կարող է լինել նրանց համար, ովքեր լուսնից են իջել։
—Ընդդիմության կողմից արվող կոչերը՝ մասնակցել հանրահավաքներին, բողոքի գործողություններին, որքանով կարող է հասարակությանը տրամադրել փողոց դուրս գալուն: Սերժ Սարգսյանի այս ակտիվացումը որքանով կարող է դրան նպաստել:
— Ակնհայտ է մի բան, որ այս իշխանությունը պետք է հեռանա, որովհետև սա մի քար է Հայաստանի Հանրապետության զարգացման վրա։ Հիմա այդ հեռացումը կլինի ամսի 20-ին, 28-ին թե երբ կլինի և ինչ ճանապարհով դա կապրենք, կտեսնենք։ Բայց որ պետք է հեռանան և հեռանալու են, դա ակնհայտ է։
Սոնա Գիշյան
