Դպրոցները կվերադառնա՞ն լիարժեք հնգօրյա ուսուցման ռեժիմի. ԿԳՄՍՆ-ն դիմել է առողջապահության նախարարությանը

ArmDaily.am-ի տեղեկությունների համաձայն՝ հանրակրթական ուսումնական հաստատություններն այս երկուշաբաթի օրվանից սկսած պետք է վերադառնային նախկին՝ լիարժեք հնգօրյա ուսուցման ռեժիմի, սակայն վերջին պահին վերջնական որոշման կայացումը հետաձգվել է։ Նախարարությունում այս թեմայի շուրջ ակտիվ քննարկումներ են ընթանում։

Կրթության փորձագետ Ատոմ Մխիթարյանը մեզ հետ զրույցում հաստատեց, որ տեղեկացված է, որ նման քննարկում եղել է, սակայն վերջնական որոշում դեռևս չկա։ «Համատեղ քննարկում եղել է կրթության և առողջապահության նախարարությունների միջև։ Կրթության նախարարությունը նման առաջարկ է ներկայացրել, սակայն առողջապահության նախարարության դիրքորոշումը դեռ չկա։ Ես կարծում եմ, որ դա տեղին որոշում կլինի և վերջապես՝ մեկ տարվա ընդմիջումից հետո, մենք կվերադառնանք նորմալ պրոցեսին»։

Նա ընդգծեց, որ Հայաստանում կենսագործունեության բոլոր ոլորտներում, որտեղ սահմանափակուներ կային կովիդով պայմանավորված՝ ազատականացված են։ «Ամեն ինչ թույլատրելի է, հետևաբար ի՞նչ իմաստ ունի կրթության ոլորտի համար այդ սահմանափակումները պահել։ Դա էապես ազդում է կրթության որակի վրա։ Արդեն մեկ տարի է, կրթության կազմակերպման գործընթացը և հանրակրթության մեջ, և բարձրագույն կրթության ոլորտում՝ բարձիթողի վիճակում է։ Առանց պատրաստելու ուսուցիչներին ու դասախոսներին, առանց հաշվի առնելու աշակերտների և ուսանողների տեխնիկական հագեցվածության աստիճանը, նրանց գիտելիքները՝ հեռավար կրթության կազմակերպման հետ կապված անցանք հեռավարի, հիմա էլ դպրոցներին թույլ են տվել անցնել հնգօրյակի, սակայն, ըստ էության՝ խտացրել են դասերը ու հիմա աշակերտների կեսը 2 օր է դպրոց են գնում, կեսը՝ 3 օր։ Մի խոսքով՝ կրթությունը հայտնվել է քաոսային իրավիճակում։ Ստացվում է՝ ամենատուժած ոլորտը հենց կրթության ոլորտն է, այն դեպքում, երբ երեխաների համար կորոնավիրուսի ազդեցությունը շատ էական չէր, ավելին՝ մասնագետները պնդում են, որ բնակչության 60-70 տոկոսը իմունիտետ ունի, իսկ երեխաների դեպքում մատների վրա կարելի է հաշվել դեպքեր, երբ նրանք ծանր են տարել վարակը։ Այսինքն, ես կարծում եմ, որ վաղուց էր պետք վերադառնալ նորմալ կրթական պրոցեսի, որպեսզի այս սերունդին էլ չկորցնենք»։

ԿԳՄՍՆ-ից մեզ տեղեկացրին, որ նախարարությունը պարբերաբար այս հարցով դիմում է առողջապահության նախարարությանը, քանի որ միայն առողջապահության նախարարության մեղմացումներց հետո ԿԳՄՍՆ-ում կարող են նման որոշում կայացնել։
«Մենք պարբերաբար դիմում ենք, բայց որտեղից իմանանք՝ մեր գրությանը կհաջորդի՞ Առողջապահության նախարարի հրամով մեղմացումը, թե ոչ»։