Ինչպե՞ս կարելի է պայքարել սոցիալական ցանցերից կախվածության դեմ
ՀԱՍԱՐԱԿՈՒԹՅՈՒՆ
Կորոնավիրուսի պատճառով հայտարարված կարանտինի ընթացքում շատերը, ըստ հոգեբան եւ գրող Միխայիլ Խորսի, սկսել են ավելի շատ ժամանակ հատկացնել մեսենջերներին, սոցիալական ցանցերին եւ առհասարակ ինտերնետին, հաղորդում է RT-ն:
Որպես կախվածության հիմնական նշան` հոգեբանը նշել է դիսկոմֆորտային վիճակն առանց գաջեթի:
«Եթե մարդը հեռախոսը մի կողմ է դնում եւ փորձում է ինչ-որ գործերով զբաղվել, սակայն անընդհատ ձգտում է նորից այնտեղ մտնել, նշանակում է, որ կախվածություն կա»,- նշել է Խորսը:
Ըստ նրա` այդպիսի կախվածությունից ազատվելու համար անհրաժեշտ է գիտակցել, որ խնդիր կա եւ ճիշտ դիրքորոշում որդեգրել սոցիալական ցանցերի նկատմամբ:
««Ուզում եմ այնտեղ մտնել» դիրքորոշումից անցնել «չեմ ուզում. ուզում եմ սպորտով զբաղվել, աշխատել, հարաբերություններ ունենալ, զարգանալ, սակայն կախվածությունն ինձ այնտեղ է ձգում»»,- ասել է հոգեբանը` հավելելով, որ այդպիսով մարդուն ավելի հեշտ է հաղթահարել կախվածությունը, որը հակասում է դրված նպատակներին:
Խորսը նաեւ խորհուրդ է տվել հետեւել սմարթֆոնում անցկացրած ժամանակին: Կան, օրինակ, հատուկ հավելվածներ, որոնք ցույց են տալիս, թե որքան ժամանակ է մարդն օգտվում այս կամ այն ծրագրից գաջեթում: Նման հավելվածների օգտագործումը թույլ կտա համարժեք գնահատել ժամանակի չափը, որն, օրինակ, անցկացվում է սոցիալական ցանցերում:
Բացի այդ, հոգեբանը օգտատերերին խորհուրդ է տվել վերցնել թուղթը եւ բաժանել այն երկու մասի. մի կողմում գրել այն, ինչ ցանկանում են, իսկ մյուս կողմում` հակառակը` այն, ինչ չեն ուզում: «Այդպես ավելի հեշտ կլինի հասկանալ, որ անդադար սքրոլը սոցիալական ցանցում հեռացում է սեփական նպատակներից»,- ասել է մասնագետը:
