Մասնագետը հերքել է ամենատարածված «միֆերը» ջրի մասին
ՀԱՍԱՐԱԿՈՒԹՅՈՒՆ
Ջուրը մարդու օրգանիզմի համար կենսական նշանակություն ունեցող հեղուկ է, քանի որ առանց դրա օրգաններն ու համակարգերը չեն կարողանա ինչպես հարկն է կատարել իրենց գործառույթները։ Այս հեղուկը շատ կարևոր է լավ ինքնազգացողության ու առողջության պահպանման համար, ուստի զարմանալի չէ, որ մասնագետները հորդորում են հետևել օրվա ընթացքում օգտագործվող հեղուկի քանակությանը, սակայն միևնույն ժամանակ կան ջրի գործածության վերաբերյալ մի շարք թյուր պնդումներ, որոնց մարդիկ շարունակում են հավատալ։
Սննդաբան Ալեքսեյ Կովալկովն անդրադարձել է այս խնդրին՝ ներկայացնելով երեք ամենատարածված «միֆերը» ջրի մասին։ Մասնագետի խոսքով՝ առաջին հերթին հարկավոր է դադարել հավատալ օրական երկու լիտր ջուր խմելու անհրաժեշտության մասին «միֆին», որը չի համապատասխանում իրականությանը։ Ինչպես բացատրում է մասնագետը, մարդու օրգանիզմն ինքնուրույն է կարգավորում հեղուկի բալանսը, ուստի ինքն է հուշում, թե երբ ու որքան ջուր է հարկավոր խմել։
Չի համապատասխանում իրականությանը նաև ջրի միջոցով քաղցը հագեցնելու մասին պնդումը, ուստի ջրի օգնությամբ չի հաջողվի նիհարել։ Մասնագետի խոսքով՝ ջուրը շատ արագ է դուրս գալիս ստամոքսից ու աղիներից, ուստի քաղցը հագեցնելու և այդ կերպ նիհարելու մասին խոսք անգամ լինել չի կարող։
Բացի այդ, շատերը խորհուրդ են տալիս սնվելուց առաջ մի բաժակ ջուր խմել՝ համարելով այս սովորությունն օրգանիզմի համար շատ օգտակար, սակայն մասնագետն ընդգծում է, որ այդ դեպքում հեղուկը դուրս կբերի ստամոքսից նորմալ մարսողության համար անհրաժեշտ ֆերմենտները, ինչն էլ կարող է մարսողական խնդիրներ առաջացնել։ Սա է պատճառը, որ ջուրը հարկավոր է խմել ոչ թե ուտելուց առաջ, այլ ուտելուց հինգ րոպե հետո։
Նյութի աղբյուրը՝ actualnews.org
