Վերջնական պատկերը հնարավոր կլինի ստանալ միայն պատվաստումներից հետո
ՀԱՍԱՐԱԿՈՒԹՅՈՒՆ
Հայաստանում COVID-19-ի թվերը նվազում են և կարծես` համավարակը դադարում է վտանգ ներկայացնել։ Այս թեմայով 1or.am կայքը զրուցել է վիրուսաբան Հովակիմ Զաքարյանի հետ պարզելու համար, թե Հայաստանում և աշխարհում ի՞նչ փուլում է գտնվում համավարակը։
- Պարոն Զաքարյան, Հայաստանում կորոնավիրուսի համավարակը կարծես՝ դադարում է վտանգ ներկայացնել։ Ի՞նչ իրավիճակ է, կարո՞ղ ենք ասել, որ վտանգն անցել է։
— Չենք կարող ասել, որ վտանգը անցել է, քանի որ, եթե բնակչության մի մասը դեռևս վարակված չէ և չկա պատվաստում և մեծ մասը պատվաստված չէ ապա վտանգ միշտ էլ կա։ Թվերի նվազումը գլոբալ տենդենց է և կարող է պայմանավորված լինել հակահամաճարակային գործողություններով, ինչը մեր դեպքում չեմ կարծում, որ այդքան ճիշտ է, քանի որ առանձնապես նոր հակահամաճարակային գործողություններ մի քանի ամսվա համեմատ չկա։ Բացի դրանից՝ թվերը կարող են նվազել նաև բնական ճանապարհով։ Սովորաբար վիրուսից բռնուկումները պիկային է՝ այսինքն գալիս հասնում է պիկի, հետո աստիճանաբար նվազում է, իսկ որոշ ժամանակ հետո կրկին սկսում է աճել։ Հիմա մենք տեսնում ենք, որ այդպես է, քանի որ տարբեր երկրներում նվազում կա և նորից կարող է թվերը աճել։ Ինչը բնական է և այս ամենը կսկսի հստակ նվազել, ձգտել մինիմումի կամ դառնալ զրո, երբ որ կլինի պատվաստանյութ և բնակչության զգալի մասը պատվաստում կստանա և պաշտպանված կլինի։ Բնականաբար, երբ որ մարդիկ պաշտպանված լինեն վիրուսը այլևս չի կարող այսքան տարածվել և դեպքերի քանակը կնվազի։
- Դուք նշեցիք, որ կան երկրներ, որտեղ հստակ նվազել են թվերը, սակայն մի շարք երկրներում դարձյալ բռնկումներ կան, և լոքդաուններ են հայտարարվում։ Ընդհանրապես ինչպե՞ս եք գնահատում այդ իրավիճակը։
— Դուք արդեն նշեցիք, թե ինչ իրավիճակ է և կան երկրներ, որ, այո, լոքդաուն են անում, որովհետև թվերը աճում են։ Երկրներ կան, որ թվերը նվազում են հետևաբար լոքդաունը ամբողջությամբ հանում են կամ թուլացնում են։ Իրավիճակը դինամիկ է՝ որոշ երկրներում կաճեն թվերը, որոշներում՝ կնվազեն և վերջնական պատկերը հնարավոր կլինի ստանալ միայն պատվաստումներից հետո։
Սոնա Գիշյան
