Հադրութում ԱԱԾ-ն իմ մարտական ստորաբաժանումը զինաթափեց պատերազմի ամենաթեժ պահին, և ինձ տեղափոխեցին Երևան. ինչո՞ւ (տեսանյութ)
ՀԱՍԱՐԱԿՈՒԹՅՈՒՆՊետք է հասկանանք դավաճանության պատճառները, ամեն ինչ վեր հանենք, դեռ ոչինչ չի ավարտվել, նոր է սկսվում: Զինվորականն իրեն բարոյական իրավունք չի վերապահում շիրիմներին այցելելու, քանի դեռ այդ վրեժը չի լուծվել: Այս մասին Եռաբլուրում լրագրողների հետ ճեպազրույցում ասաց ինքնապաշտպանական ջոկատի հրամանատար Արթուր Այվազյանը:
Դիտարկանը, թե բոլորը դավաճանների մասին են խոսում, սակայն անուններ չեն տալիս, նա արձագանքեց. «Հադրութի դեպքերով երկու քրեական գործ է հարուցվել՝ պատերազմական հանցագործությունների էպիզոդներով: Եթե օբյեկտիվ քննութուն ընթանա, գոնե մի դավաճանական դեպք բացահայտվի, կհասկանանք՝ այս ամբողջ շղթան, և թե ինչ տեղի է ունեցել»:
Հարցին՝ Նիկոլ Փաշինյանը դավաճա՞ն է, արդյո՞ք հողերը հանձնել է, Այվազյանն արձագանքեց. «Ես դա արդեն համարում եմ անառարկելի փաստ, և եթե ինքը ոչ մի առնչություն չունի այս ամեն ինչին, հետպատերազմյան այս ամբողջ շրջանում ինչո՞ւ չի բացահայտում՝ ինչ տեղի ունեցավ, Եռաբլուրն ինչո՞ւ այսքան լայնացավ, ո՞վ է սրա պատասխանը տալու: Միանշանակ, նա դավաճան է և պատասխան է տալու»,-ասաց նա նշելով, թե Փաշինյանը պետք է հեռանա:
«Ես միանշանակ համոզված եմ, որ Փաշինյանը ոչ միայն պետք է հեռանա, այլև պետք է ենթարկվի պատասխանատվության, և երկրի կառավարումը հրատապ կարգով պետք է անցնի ռազմական ուղղվածության: Քաղաքական գործիչները տանուլ են մեր ամբողջ պետական համակարգի գործունեությունը»,-ասաց նա՝ նշելով նաև, թե դավաճանը միայն Փաշինյանը չէ, կան խորքային պատճառներ:
«Նայեք ժողովրդի թմբիրին: Մի քանի օրից սկսվելու են ավելի մեծ զորավարժություններ, ժողովրդի ձայնը չի լսվում, ոչ ոք դրա մասին չի խոսում: Այս թմբիրից արթնանալ է պետք, և կստանանք այն բանակը, որ մեզ հիմա պետք է»,-ասաց նա:
Դիտարկմանը, թե իշխանությունները նշում են, որ «նախկիններն իրենց գրպանն են գցել Արցախի հարցը», Այվազյանն արձագանքեց. «Եթե նախկինները Արցախը գցեցին իրենց գրպանը, ապա ներկաների ժամանակ Հադրութի օպերացիաների ընթացքում իմ մարտական ստորաբաժանումը ԱԱԾ ուժերով զինաթափեցին պատերազմի ամենաթեժ պահին, երբ ամենակարևոր խնդիրներն էինք կատարում և դիմագրավում էինք հակառակորդի կոնկրետ դիվերսիոն խմբերին: Ինձ զինաթափելով տեղափոխեցին Երևան: Հիմա վարչապետի պաշտոնը զբաղեցնողին եմ հարցնում՝ ինչո՞ւ»,-ասաց նա:
Հարցին՝ իրենց կոնկրետ ո՞վ է հրաման տվել, որ պետք է լքեն տարածքը, նա պատասխանեց՝ ԱՀ ԱԱԾ տնօրենը՝ պաշտպանության փոխնախարար Դավիթ Մանուկյանի անմիջական ղեկավարությամբ: «Հիմնավորումն այն է եղել, որ այդ տարածքում մենք չպետք է դարանակալում իրականացնենք, որովհետև այդ տարածքում շատ թանկարժեք շինություն կար, ոը պատկանել է նախկին փոխվարչապետ Արթուր Աղաբեկյանին, և հնարավոր ռազմական կոնֆլիկտի դեպքում այն միգուցե վնասվեր»,-ասաց նա:
Այվազյանի կարծիքով՝ բանակը միասնական չի գործել: Դիտարկմանը, թե ասում են՝ ղեկավարում չի եղել, նա արձագանքեց. «Ղեկավարում ինչպես կարող էր լինել, եթե արցախյան հրամանատարությունը հայաստանյան քաղաքական էլիտայի կողմից համարվել է դավաճանների կույտ, իսկ այդ մարդիկ դավաճաններ չէին»,-նշեց նա:
Այն դիտարմանն էլ, թե ՊՆ նախկին նախարար Դավիթ Տոնոյանն ասել է՝ չեն հասցրել պատրաստվել պատերազմին, Այվազյանն արձագանքեց. «Եթե Դավիթ Տոնոյանն իրեն հարգող պաշտպանության նախարար էր, եթե իրեն հարգող հրամանատար էր, պետք է հենց տեղում օպերատիվ միջոցներ ձեռք առնեին, բանակը գնար բունտի, և երկրի կառավարումը վերցներ իր ձեռքը»,-ասաց նա:
Դիտարկմանը, թե խոսակցություններ են շրջանառվում, որ մարտին նորից պատերազմ կլինի, կա՞ նման վտանգ, Այվազյանն արձագանքեց. «Քանի դեռ անգամ Սյունքիում մենք պաշտպանված չենք, այդ ռիսկն ո՞վ կարող է հերքել: Մեր պետական սահմանն ամբողջությամբ խաթարված է, մենք պետական սահման չունենք»:
