Վարչապետ Նիկոլ Փաշինյանը չի կարող ապահովել բանակցությունների հայանպաստ ընթացքը
ՔԱՂԱՔԱԿԱՆՈՒԹՅՈՒՆ
1or.am կայքը գերիների հարցի կարգավորման հետագայում իրագործվելիք քայլերի մասին զրուցել է փաստաբանների պալատի նախագահ Արա Զոհրաբյանի հետ։
- Պարոն Զոհրաբյան, Նիկոլ Փաշինյանը հայտարարեց, որ մոսկովյան հանդիպմանը չի հաջողվել լուծել ռազմագերիների հարցը: Գերիների հարցը կարգավորելու համար մեր հաջորդ քայլը, որը պետք է լինի:
— Կարծում եմ, որ Հայաստանի Հանրապետության կողմից բանակցող անձը չպետք է լինի կաշկանդված: Վարչապետ Նիկոլ Փաշինյանը չի կարող ապահովել այդ բանակցությունների հայանպաստ ընթացքը: Պետք է փոխվի կառավարության կազմը և գան նոր մարդիկ: Սա է այս պահին առաջին և ամենակարևոր քայլը:
Բացի այդ, հավելեմ, որ թե՛ Հայաստանի Հանրապետությունը, և թե՛ Ադրբեջանի Հանրապետությունը վավերացրել են Ռազմագերիների հետ վարվելակերպի մասին կոնվենցիան, որի 118-րդ հոդվածի համաձայն՝ Ռազմագերիներն ազատվում և հայրենադարձվում են անմիջապես ռազմական գործողությունները դադարեցվելուց հետո:
Չնայած եռակողմ հայտարարության 8-րդ կետում ռազմագերիների փոխանակման մասով ժամկետներ չեն նշվել, սակայն Կոնվենցիան օգտագործում է հայրենադարձման «ԱՆՄԻՋԱՊԵՍ» եզրույթը:
- Խոսվում է, որ 10-12 կանայք կան գերիների մեջ, որը նաև ՄԻԵԴ-ն է հաստատում: Այս պայմաններում միջազգային կառույցները ինչպիսի աջակցություն պետք է ցույց տան Հայաստանին գոնե կանանց հետ վերադարձնելու համար:
— Միջազգային կառույցների մասով պետք է նշեմ, որ արդյունավետության տեսանկյունից կարևորվում է Մարդու իրավունքների եվրոպական դատարանը, որը նաև հրատապ միջոց կիրառելու իրավասություն ունի: Մնացած միջազգային կառույցները տվյալ դեպքում արդյունավետ չեն: Գերիների հետ վերադարձը միջազգային կառույցների միջոցով հնարավոր կլինի ՄԻԵԴ համապատասխան որոշումների առկայության դեպքում:
Սոնա Գիշյան
