Հայաստանի ռուսական բազայում կորոնավիրուսի դեմ պատվաստում է սկսվել (տեսանյութ)

Հայաստանում տեղակայված Հարավային ռազմական օկրուգի ռուսական ռազմաբազայում կորոնավիրուսային վարակի դեմ «Ստուտնիկ V» պատվաստանյութի պատվաստուկի առաջին բաղադրիչով սկսել են պատվաստել անձնակազմին։

ՌԴ պաշտպանության նախարարության Հարավային ռազմական օկրուգի մամուլի ծառայությունը հայտնում է, որ հազար չափաբաժին արդեն  մատակարարվել է Ռուսաստանի պաշտպանության նախարարության զինվորական կլինիկական հոսպիտալի Գյումրու մասնաճյուղ։

«Պատվաստում անցկացնելու ընթացքում բարդացումներ չեն եղել։ Պատվաստումն իրականացվում է կամավոր, զինծառայողների ու քաղաքացիական անձնակազմի գրավոր համաձայնությամբ», - նշված է հաղորդագրության մեջ։

Ընդհանուր առմամբ, COVID-19-ի դեմ ավելի քան 23  հազար չափաբաժին պատվաստանյութ է մատակարարվել Հարավային ռազմական օկրուգին։

Այս պահին «Սպուտնիկ-V» պատվաստանյութի երկու բաղադրիչը ստացել են ավելի քան վեց հազար զինծառայող ու բուժանձնակազմի անդամ։ Եվս 14 հազար զինվոր ու սպա պատվաստվել են պատվաստանյութի առաջին բաղադրիչով։

Երկու ամսվա ընթացքում նախատեսվում է պատվաստել Հարավային ռազմական օկրուգի ավելի քան 60 հազար զինծառայողի ու զորամասերի և հաստատությունների անձնակազմի քաղաքացիական աշխատողների։

Հիշեցնենք` Ռուսաստանն աշխարհում առաջինն է գրանցել Covid-19–ի դեմ պատվաստանյութը, որը ստեղծել են Գամալեայի կենտրոնը և Ուղիղ ներդրումների ռուսական հիմնադրամը։ Այն ստացել է «Սպուտնիկ V» անվանումը։ Առաջին խմբաքանակն արդեն շրջանառության մեջ է դրվել և Ռուսաստանի մարզեր է մատակարարվում։

Նոյեմբերի 21-ին Հայաստան էր ժամանել Ռուսաստանի միջգերատեսչական պատվիրակությունը, որում նաև առողջապահության ոլորտի ներկայացուցիչներ էին ընդգրկված։ Ռուսաստանի առողջապահության նախարար Միխայիլ Մուրաշկոն ՀՀ առողջապահության նախարար Արսեն Թորոսյանին էր փոխանցել կորոնավիրուսի ռուսական պատվաստանյութի` «Սպուտնիկ V»-ի առաջին նմուշները։