Անվերջ ստելու համար թանկ է վճարում երկիրը
ՎԵՐԼՈՒԾՈՒԹՅՈՒՆՆԵՐ
Կարելի է անվերջ երեք բանի նայել, հոսող ջրին, վառվող կրակին և Նիկոլ Փաշինյանի անթաքույց ստերին։ Երբ Նիկոլ Փաշինյանը ասում է համահայաստանյան սուտ, այսինքն եթե դրա սպառողը ՀՀ քաղաքացիներն են, ապա դա մի կերպ կարելի է լղոզել ու անցնել առաջ։ Դե հայ հանրությունը գիտի, որ եթե Փաշինյանը նեղն է ընկնում անպայման կամ ստում է, կամ սադրում է, կամ մանիպուլացնում է, կամ քրեական ինչ-որ շինծու գործ է կարել տալիս, կամ...մի խոսքով։ Բայց ոչ մի կերպ չես հասկանում, թե ի՞նչ է մտածում Նիկոլը, երբ ասում է սուտ, որին մասնակից է դարձնում այլ երկրների ղեկավարներին, բարձրաստիճան պաշտոնյաներին։ Տպավորություն է, թե Փաշինյանին զեկուցել են, թե իր հոդվածները, ելույթները կարդում ու լսում են միայն իր կողմնակիցները։ Տպավորություն է, թե երկրի ղեկավարը ոչ միայն կառավարչական և դիվանագիտական տարրական գիտելիքներ չունի, այլ տարրական հարգանք ու էթիկա չունի գործընկեր և բարեկամ երկրների հանդեպ։ Ի՞նչ է պատահել։
Հերթական անգամ Նիկոլը բռնվել է ստի վրա ու մեր երկիրը հերթական անգամ դրել անհարմար վիճակի մեջ։ ԵԱՀԿ Մինսկի խմբի ռուսաստանցի համանախագահ, ՌԴ արտաքին գործերի նախարարության հատուկ հանձնարարությունների գծով դեսպան Իգոր Պոպովը պատասխանել է ՀՀ վարչապետ Նիկոլ Փաշինյանի «44-օրյա պատերազմի ակունքները» հոդվածին։ Պապովը նշել է. «Պնդումը, թե Ռուսաստանն առաջարկել է յոթ շրջանները վերադարձնել «ոչնչի դիմաց», մոռանալ կարգավիճակի մասին և հանդարտվել, իրականությանը չի համապատասխանում»:
Կարդում ու մտածում ես՝ լավ կարո՞ղ է երկրի ղեկավարն այսքան չհարգել սեփական երկիրը, ժողովրդին, ինքն իրեն, իր զբաղեցրած դիրքը։ Կարո՞ղ է երկրի ղեկավարը ասել սուտ, հետո ստիպված ևս 15-20 անգամ ստել, որպեսզի նախորդ անգամներում ասված ստերը ծածկադմփոց անի։ Նիկոլ Փաշինյանի ողբերգությունն այն է, որ նա շատ հարցերում կարող էր ստել ու մանիպուլացնել, բայց ոչ երբեք Արցախի հարցում։ Դա մեր երկրի համար արժեցավ Արցախի մեծ մասի կորուստ, հազարավոր զոհեր, վիրավորներ ու գերիներ։ Նիկոլի կրկնակի ողբերգությունն այն է, որ նա կանգ առնել չի կարողանում, շարունակում է ստել։ Ու էլի Արցախի մասով։
Կարեն Դանիելյան
