Եվ այդ մեկ ուսապարկը դու ես

Քաղաքացիական պայմանագիր կուսակցության մամուլի խոսնակ Վահագն Ալեքսանյանի վերջին գրառումը բավականին ծիծաղելի դրության մեջ է դրել իշխող ուժին։ Ի՞նչ տեղի ունեցավ։ Իմ քայլը խմբակցությունից դուրս եկավ պատգամավոր Սոֆյա Հովսեփյանը։ Ի դեպ, սա այն եզակի պատգամավորներից է, ով աչքի է ընկել ոչ միայն աշխատասիրությամբ, այլև թիմի ներսում սեփական տեսակետների համար շատ թե քիչ պայքարելու ռիսկով։

Դե, ինչպես ցույց է տալիս կյանքը, Իմ քայլում գրեթե բոլորը, որոշակի բացառություններով, ընդամենը լուռ կոճակ սեղմող են աշխատում։ Եվ այսպես, ՔՊ խոսնակը Սոֆյա Հովսեփյանին ուղղված ֆեյսբուքյան գրառման մեջ մի ցնցող եզրահանգման է եկել։ Նա գրել է, որ եթե Սոֆյա Հովսեփյանի հետ թեկնածու լիներ նաև Նիկոլի ուսապարկը, ապա ուսապարկն ավելի շատ ձայն կհավաքեր ու մի հորիզոնական վերև տեղ կզբաղեցներ։

Արձանագրենք, որ խոսնակը նույն միտքը կարող է պրոյեկտել Իմ քայլի գրեթե բոլոր պատգամավորների վրա, եթե նրանք էլ մի օր ռիսկ անեն դուրս գալ խմբակցությունից։ Բայց դա այլ քննարկման թեմա է։ Խնդիրն ուշագրավ է այլ տեսանկյունից։ Խոսնակը նախևառաջ բառացի ասում է, որ Նիկոլ Փաշինյանը խորհրդարան է բերել ուսապարկից ավելի ցածր հեղինակություն ունեցող մարդկանց։

Եվ երկրորդ՝ խոսնակն ասում է, որ Նիկոլ Փաշինյանի կուսակցությունը առաջադրել է ուսապարկից ցածր հեղինակություն մարդկանց ու 800 հազարից ավել մարդ քվեարկել է, դիցուք, ուսապարկերի օգտին։

Սկզբից գանք։ Եթե խոսնակի հայտարարությունից հետո, նա չի ազատվում զբաղեցրած պաշտոնից, նշանակում է՝ նա արտահայտում է նաև Նիկոլ Փաշինյանի տեսակետը։ Եթե նա արտահայտում է նաև Փաշինյանի տեսակետը, ապա Իմ քայլի շատ թե քիչ իրեն հարգող ցանկացած պատգամավոր պետք է իր վրդովմունքն արտահայտեր նվազագույնը, խմբակցությունը լքեր՝ առավելագույնը։ Դա չեղավ քիչ չէ, ավելին՝ Իմ քայլի մի քանի պատգամավորներ ոչ միայն այսպես ասած լայքել էին խոսնակի գրառումը, այլև հանդես էին եկել առանձին գրառումներով։

Խոսնակի գրառման երկրորդ ու թերևս ամենանողկալի մեսիջն այն է, որ ՀՀ ընտրողները մասսայաբար քվեարկել են ուսապարկից նվազ հեղինակություն ունեցող տասնյակ թեկնածուների օգտին։ Սա թերևս սեփական էլեկտորատին հրապարակայնորեն վիրավորելու երբևէ եղած ամենացցուն դրսևորումն է։ Ինչևէ, կարծում եմ, մարդիկ սա կհիշեն հաջորդ ընտրություններում։

Ի դեպ, սա առաջին դեպքը չէ, երբ Իմ քայլի պատգամավորներն ու պաշտոնյաները ընտրողների մասին նման կարծիք են հայտնում։ Հիշում ենք Իմ քայլը խմբակցության մեկ այլ պատգամավոր Բաբկեն Թունյանի հայտնի միտքը իր հարևան Պողոսի մասին։ Թերևս այդքան էլ ուշադրության արժանի չլիներ ՔՊ խոսնակի միտքը, և մենք այն ընդամենը ներթիմային հասարակ գզվռտոց համարեինք, եթե մեր երկիրը կանգնած չլիներ արտաքին և ներքին բազմաթիվ մարտահրավերների առաջ։

Տեսեք, պառլամենտական կառավարում ունեցող երկրի պատգամավորները իզոլացված են երկրի կառավարման գործընթացներից։ Դիցուք, իշխող խմբակցության 80-ից ավելի պատգամավոր մամուլից է իմանում, որ երկրի վարչապետը, ով հենց պառլամենտին է հաշվետու, համատեղությամբ իրենց թիմի ղեկավարը 44 օր 《հերոսաբար》 հաղթելուց հետո, կապիտուլացիայի փաստաթուղթ է ստորագրում։ Կարող ենք ենթադրել, թե ինչ կլիներ բոլոր նորմալ երկրներում նման դեպքերում։ Նվազագույնը իշխող ուժը պաշտոնանկ կաներ վարչապետին։

Բայց ինչպես տեսնում ենք պառլամենտական կառավարման երկրի խորհրդարանի իշխող ուժի պատգամավորները լուռ համաձայնությամբ հաստատում են դասականի հայտի արտահայտության նորաոճ դրսևորումը՝ և այդ մեկ ուսապարկը դու ես։ Ակամայից հիշեցի նաև Իմ քայլը խմբակցության պատգամավոր Քրիստինե Պողոսյանի ելույթը, ով ԱԺ դահլիճում ցուցադրելով շողոքորթության և դիլետանտության մաստեր կլաս վարչապետ Նիկոլ Փաշինյանին ասաց. «Պարոն վարչապետ, ուզում եմ ասել՝ Ձեր հանդեպ իմ վստահությունն այնքան խորը արմատներ ունի և այնքան հեռու է գնում, կախված Ձեր կատարած գործունեությամբ և անցած ճանապարհով, որ եթե անգամ Դուք բերեիք կառավարության ծրագիր, որտեղ գրված կլիներ 1 նախադասություն՝ ամեն ինչ շատ-շատ լավ է լինելու, ես վստահելու էի Ձեզ և «կողմ» էի քվեարկելու»:

Տպավորություն է, թե ՔՊ խոսնակը վերը հիշատակված գրառումն արել է՝ հիշելով նաև Քրիստինե Պողոսյանի հայտնի ելույթը։ Պարզապես Իմ քայլում հավանաբար բոլոր պատգամավորներին նույն արշինով են չափչփում։

Անի Գրիգորյան