COVID-19-ը կարող է քրոնիկ հիվանդություն դառնալ. գիտնականներ
ՀԱՍԱՐԱԿՈՒԹՅՈՒՆ
Նիդեռլանդներից եւ Բելգիայից գիտնականները, ուսումնասիրելով թեթեւ տեսակի COVID-19-ից ապաքինման գործընթացը, եզրակացրել են, որ հիվանդությունը կարող է քրոնիկ դառնալ: Գիտնականներն առաջարկում են քրոնիկ հիվանդներ համարել այն մարդկանց, ովքեր 12 շաբաթ անց բողոքում են հիվանդության հետեւանքներից:
Ինչպես հայտնում է «Մոսկովսկի կոմսոմոլեցը», բարդությունները, ինչպես պարզել են գիտնականները, կարող են սկսվել ապաքինվելուց նույնիսկ մի քանի շաբաթ կամ ամիսներ անց: Ավելին, COVID-19 տարած յուրաքանչյուր երրորդ մարդը դառնում է «կողմնակի խնամքից քիչ թե շատ կախված»:
Հետազոտության հեղինակներն ուսումնասիրել են 1837 մարդու տվյալներ, որոնց միջին տարիքը 47 է եղել: Նրանք բոլորը բուժվել են ամբուլատոր պայմաններում, եւ բոլորի մոտ կորոնավիրուսի հետեւանքների բողոքները պահպանվել են առնվազն 3 ամիս: Պացիենտների 98%-ը շարունակել է զգալ հոգնածություն, 90%-ը տառապել է մկանների թուլությունից, 88%-ը քնի խնդիրներ է ունեցել, իսկ 87%-ը դժգոհել է ցավերից: Միեւնույն ժամանակ, շատ հիվանդների մոտ աշխատանքի արտադրողականությունը զգալիորեն ընկել է: Հետազոտության մասնակիցների 86%-ը նշել է, որ հիվանդությունից առաջ առողջական խնդիրներ չի ունեցել: Բայց կորոնավիրուսի վարակից հետո իրենց առողջ համարող մարդկանց թիվը կրճատվել է մինչեւ 6%։
Հետազոտողների կարծիքով՝ այս տվյալները կարող են վկայել թեթեւ տեսակի COVID-19 տարած հիվանդների անբավարար ապաքինման մասին, քանի որ առկա բոլոր ծրագրերն ուղղված են հոսպիտալացված հիվանդներին օգնելուն: Ավելին, գիտնականներն առաջարկում են կորոնավիրուսի ազդեցությունից 12 կամ ավելի շաբաթ տառապող մարդկանց համարել քրոնիկ հիվանդներ: Մասնագետները նշել են նաեւ, որ ապագայում նման հիվանդները կարող են լուրջ ծանրաբեռնվածություն ստեղծել համաշխարհային առողջապահության համար, ուստի արդեն այսօր նրանց վերականգնողական հատուկ մեթոդներ են անհրաժեշտ:
