Չելյաբինսկի սրճարանը օրագրում բարձր գնահատականներ ունեցող աշակերտներին ձրի կերակրում է շաուրմայով
ՀԱՍԱՐԱԿՈՒԹՅՈՒՆ
mel.fm-ն գրում է, որ Չելյաբինսկում ավտոտեխսպասարկմանը կից սրճարանի աշխատակիցները անվճար սնունդ են տրամադրում այն դպրոցականներին, որոնք այդ օրը առնվազն երեք լավ գնահատական են ստացել: Հովհաննես Հովհաննիսյանը մոտ վեց ամիս առաջ է միտք հղացել մեկ օրում երեք չորս կամ հինգ ստացած աշակերտներին անվճար շաուրմա տալ: Հիմա առաջին և երկրորդ հերթափոխից հետո սրճարանում միշտ դպրոցականների բազմություն է լինում:
«Ամեն ինչ իսկապես պատահաբար սկսվեց: Ես նստած էի իմ տեղում վաճառասեղանի ետևում: Երեք դպրոցական եկան, նստեցին սեղանի մոտ, և սկսեցին կոպեկները հաշվել, որպեսզի վճարեն շաուրմայի համար: Ես նայեցի դրան, ինչ-որ տհաճություն զգացի և ասացի. «Տղե՛րք, ինչպե՞ս եք սովորում»: Պատասխանն էր. «Դե, լավ: Չորս, հինգ, երբեմն երեք»: Ես ասացի. «Այսպիսով, վաղվանից, ով օրական ստանա երեք չորս կամ հինգ՝ իմ կողմից անվճար շաուրմա կստանա, նաև կստուգեմ տնային առաջադրանքները, որպեսզի գրված լինի օրագրում»,- ասել է Հովհաննեսը:
Եվ հիմա երեխաներն ավելի պատասխանատու են օրագրերը լրացնելու հարցում: Հովհաննեսի գործընկերները աջակցել են նրան, իսկ աշխատակիցները ստանձնել են ծախսերը: Աստիճանաբար, այլ թաղամասերի դպրոցականներ էլ են իմացել սրճարանի ակցիայի մասին: Հիմա աշակերտների ծնողները երախտագիտությամբ են լցված սրճարանի նկատմամբ, քանի որ նրանց երեխաները սկսել են լավ սովորել:
«Հետագայում երեխաները դրա կարիքը կունենան, և նրանք կսովորեն, թե ինչն է լավ, և դա սովորելու համար լավ է: Աստված տա, որ նրանք ինչ որ բանի հասնեն: Այդ երեխաներից շատերը չեն հավատում, որ 21-րդ դարում ինչ-որ բան անվճար են տալիս: Գալիս են օրագրերով, բայց ամաչում են մտնել,- ասել է ավտոտեխսպասարկման պետ Սամվել Պողոսյանը: «Մենք Հայաստանից ենք և այստեղ ապրում ենք ավելի քան 10 տարի: Մենք օգնում ենք մեծահասակներին և երեխաներին, որքան կարող ենք: Մեր արյան մեջ է, որ մարդը պետք է բարի լինի: Օգնեք նախ ուրիշներին, ապա մտածեք ձեր մասին: Եթե յուրաքանչյուրը միայն իր մասին մտածի, կյանքում ոչ մի բանի չես կարողանա հասնել»,- հավելել է նա:
Նյութը հրապարակման պատրաստեց Կամո Խաչիկյանը
