Ի՞նչ օրակարգով ու պայմանով խորհրդարանական և արտախորհրդարանական ուժերը կհանդիպեն Նիկոլ Փաշինյանի հետ

Նիկոլ Փաշինյանը դեկտեմբերի 25-ին ֆեյսբուքյան գրառման միջոցով տեղեկացրել էր 2021 թվականին արտահերթ խորհրդարանական ընտրություններ անցկացնելու մասին։

Ըստ նրա՝ վարչապետի պաշտոնի ու երկրի հետագա քաղաքական առաջնորդության ճակատագիրը պետք է որոշի ժողովուրդը՝ իր կամքի ազատ արտահայտմամբ։

«Ես որպես Հայաստանի վարչապետ, ինձ համարում եմ այդ կամքի ազատ արտահայտման երաշխավորը։

Նաև պատրաստ եմ ժողովրդի որոշման արդյունքում թողնել վարչապետի պաշտոնը։ Եվ վարչապետի պաշտոնը կարող եմ թողնել միայն ժողովրդի որոշմամբ։

Նաև պատրաստ եմ ժողովրդի վստահության վերահաստատման դեպքում հետագայում էլ շարունակել Հայաստանի Հանրապետության առաջնորդությունը՝ այս դժվարին ժամանակներում։

Այս բոլոր հարցադրումների պատասխանը ստանալու միայն մի տարբերակ կա՝ արտահերթ խորհրդարանական ընտրությունների անցկացումը։

Ելնելով վերը նշվածից՝ խորհրդարանական և հետաքրքրված արտախորհրդարանական ուժերին հրավիրում եմ խորհրդակցությունների՝ 2021 թվականին արտահերթ խորհրդարանական ընտրություններ անցկացնելու հարցով»,- գրել էր Նիկոլ Փաշինյանը։

168.am-ը արտախորհրդարանական և խորհրդարանական որոշ քաղաքական ուժերից փորձեց ճշտել՝ պատրա՞ստ են արտահերթ խորհրդարանական ընտրություններ անցկացնելու օրակարգով հանդիպել Նիկոլ Փաշինյանի հետ։

Հայաստանի Հանրապետական կուսակցության խոսնակ, ԱԺ նախկին փոխնախագահ Էդուարդ Շարմազանովն ասաց, որ դավաճան և հողատու Նիկոլ Փաշինյանի հետ որևէ քննարկելու բան չունեն՝ բացի նրա հրաժարականից։

«Նիկոլ Փաշինյանն արհամարհել է Գլխավոր շտաբի պետ Օնիկ Գասպարյանի կոչերը՝ պատերազմը դադարեցնելու վերաբերյալ, նաև իմ կոչը՝ հոկտեմբերի 12-ին ես եմ նրան ասել՝ դիմի՛ր Պուտինին, որպեսզի պատերազմը կանգնեցնի։ Նա արհամարհել է Պուտինի հոկտեմբերի 19-ի առաջարկը՝ պատերազմը կանգնեցնելու վերաբերյալ։ Այդ պատերազմը նա է բերել, ինքն է դարձել 5 հազար զոհի պատճառ, նա հողատու է։ Նույնիսկ նոյեմբերի 9-ի, լույս 10-ի գիշերը ստորագրած կապիտուլյացիոն ակտից հետո մենք և՛ Արցախում ենք տարածքներ կորցնում, զոհեր ու գերիներ ունենում, և՛ Սյունիքում։ Մենք այս հողատուի հետ ի՞նչ  բանակցենք, նրա հետ բանակցելու բան չկա։ Դավաճանի հետ բանակցելու բան չկա, նա պետք է հեռանա, իսկ դրանից հետո օրենքով սահմանված կարգով ամեն մեկը պետք է ենթարկվի իր բաժին պատասխանատվության։ Ի՞նչ է  նշանակում՝ գնանք նրա հետ իր օրակարգը քննարկենք, ինչը քննարկենք։ Ո՞ւմ հետ քննարկենք, Ալիևի առաջ կզածի հե՞տ բան քննարկենք, հայրենիքը տվածի հե՞տ քննարկենք»,- ասաց Էդուարդ Շարմազանովը։

Ըստ նրա, Նիկոլ Փաշինյանն իր մանիպուլյացիաներով ու «մուտիլովկաներով» շեղում է հանրութան ուշադրությունը։

Էդուարդ Շարմազանովն ընդգծեց, որ Նիկոլ Փաշինյանը  պետք է հեռանա՝ նրա հրաժարականն այսօր պահանջում են երկու Կաթողիկոսները, համահայկական գործիչները, ԳԱԱ-ն, բուհերը, 200-ից ավելի համայնքապետեր, նախկին գեներալիտետը, ՀՀ բոլոր նախկին նախագահները, նախկին վարչապետները։

«Նիկոլ Փաշինյանը որ ասում է՝ ժողովրդական աջակցություն չկա, այդ իրե՞նն է ժողովրդական աջակցությունը, երբ ոստիկանական շարասյան ու վահանների տակ կզած՝ մտնում է Եռաբլուր ու պղծում է։ Նրա հետ խոսելու բան չկա, մի խոսելու բան կա՝ իր հրաժարականը։ Ոչ մի արտահերթ ընտրություն, արտահերթ ընտրություն կլինի միայն Նիկոլի հրաժարականից մեկ տարի հետո։ Այս իրավիճակում, երբ պետք է Փաշինյանը գերիների ու անհետ կորածների խնդիրներով զբաղվի, ՀՀ սահմանների հարցերով, դրել՝ արտահերթ ընտրություն է անում, որ պատասխանատվությունն իր վրայից գցի հանրության վրա։ Ինքը քաղաքական դիակ է, մսխել է ՀՀ ինքնիշխանությունը, մենք իր հետ կեղծ օրակարգով քննարկելու բան չունենք»,- շեշտեց նա։

ԱԺ «Լուսավոր Հայաստան» խմբակցության քարտուղար Գևորգ Գորգիսյանի խոսքով՝ հարցը դեռ պետք է քննարկի կառավարման խորհուրդը, սակայն դրանով հանդերձ՝ իրենց օրակարգում որևէ փոփոխություն չկա։

«Մեր բոլոր ասածներն ուժի մեջ է, որ երկրում փաստացի անիշխանություն է, Նիկոլ Փաշինյանն ավերել է մեր պետական բոլոր ինստիտուտները։ Նրա ղեկավարման օրոք գնալ ընտրությունների՝ հղի է մեծ վտանգներով, որովհետև  մենք չունենք որևէ աշխատող համակարգ, որը կարող է կանխել ընտրակաշառքների բաժանումը։ Հետևաբար՝ Նիկոլ Փաշինյանը պետք է հրաժարական տա, ձևավորվի նոր կառավարություն, որը կլինի կոնսենսուսային և որն առաջին հերթին երկիրը կբերի իր ստաբիլ վիճակին, միայն դրանից հետո կգնանք արտահերթ ընտրությունների»,- շեշտեց Գ. Գորգիսյանը։

«Ժառանգություն» կուսակցության նախագահ Նարինե Դիլբարյանն էլ ասաց, որ 2021 թվականին պետք է լինեն արտահերթ ընտրություններ, բայց Նիկոլ Փաշինյանի հրաժարականի պարագայում։

«Մեր դիրքորոշումը հստակ է՝ Նիկոլ Փաշինյանը չի կարող լինել երաշխավորը և կազմակերպիչն այդ ընտրությունների, ուստի որևէ բանակցություն հնարավոր է այն օրակարգով, թե երբ է Նիկոլ Փաշինյանը հրաժարական տալու և ինչպես ենք ձևավորելու նոր կառավարություն, նոր վարչապետով, այսպես ասած, անցումային կառավարություն՝ ազգային համաձայնության սկզբունքի հիման վրա»,- ընդգծեց նա։

Ըստ «Քաղաքացու որոշում» սոցիալ-դեմոկրատական կուսակցության գործադիր մարմնի քարտուղար Սուրեն Սահակյանի, դեռ որոշում չունեն Նիկոլ Փաշինյանի հետ իր առաջարկած օրակարգով  հանդիպելու վերաբերյալ:

«Արտահերթ ընտրությունների վերաբերյալ բազմիցս խոսել ենք, որ այս պահին դա անհնար է։ Բայց եթե դա քաղաքական ճգնաժամը հանգուցալուծելու է և դրա միակ ճանապարհն է՝ ինչո՞ւ ոչ»,- եզրափակեց նա։