Որքա՞ն է երկրորդ անգամ կորոնավիրուսով վարակվելու հավանականությունը

Կորոնավիրուսի նկատմամբ հակամարմիններով հիվանդների մոտ կրկին վարակվելու ռիսկը շատ ցածր է: Նման եզրակացության են հանգել ԱՄՆ-ում եւ Մեծ Բրիտանիայում անցկացված երկու խոշոր հետազոտությունների հեղինակները:

Medportal.ru-ի փոխանցմամբ` Քաղցկեղի ազգային ինստիտուտի հետազոտության մեջ օգտագործվել են ավելի քան 3.2 միլիոն ամերիկացիների տվյալները, ովքեր թեստեր են հանձնել մասնավոր լաբորատորիաներում: Գիտնականները վերլուծել են նրանց առողջության մասին տվյալները ՊՇՌ թեստերը հանձնելուց հետո մեկ, երկու եւ երեք ամսվա ընթացքում:

Հետազոտության ընթացքում հակամարմին չունեցող հիվանդների 3 տոկոսը հիվանդացել է COVID-19-ով, իսկ COVID-19 տարած եւ հակամարմիններ ունեցողների մոտ այդ ցուցանիշը ընդամենը 0.3 տոկոս է կազմել: Դա նշանակում է, որ հակամարմիններ ունեցող հիվանդների մոտ նախորդ վարակումից հետո նորից վարակվելու հավանականությունը 10 անգամ ցածր էր: Սակայն պաշտպանության տեւողությունը գնահատելու համար հետագա զննումներ են անհրաժեշտ, նշում են հետազոտության հեղինակները:

New England Journal of Medicine-ում հրապարակված մեկ այլ հետազոտության մեջ գիտնականները վերլուծել են Օքսֆորդի համալսարանի հիվանդանոցների ավելի քան 12.500 բուժաշխատողների տվյալները, ում հետեւել են 6 ամիսների ընթացքում: Գիտնականներն օգտագործել են նաեւ տեղեկատվությունը հակամարմինների թեստերի եւ ՊՇՌ թեստերի արդյունքների վերաբերյալ: COVID-19 տարած 1200 մարդուց միայն երկուսն են 6 ամսվա ընթացքում կրկին վարակվել կորոնավիրուսով: Միեւնույն ժամանակ, 11300 աշխատակցից, ովքեր հակամարմիններ չունեին, հիվանդացել է 223 մարդ:

Գիտնականները հիշեցնում են, որ, չնայած իմունիտետի տեւողության վերաբերյալ վերջնական տվյալներ չկան, մարդիկ, ովքեր առողջացել են COVID-19-ից, պետք է շարունակեն հետեւել կանխարգելիչ միջոցառումներին` դիմակներ կրել եւ սոցիալական հեռավորություն պահպանել: