Ծանոթ ու միաժամանակ անհայտ՝ եգիպտացորենի փաթիլներ
ՀԱՍԱՐԱԿՈՒԹՅՈՒՆ
Եգիպտացորենի փաթիլների պատմությունը սկիզբ է առել 19-րդ դարի սկզբում: Միչիգան նահանգի համանուն քաղաքի «Բաթլ-Կրիկ» առողջարանի սեփականատերերը՝ դոկտոր Ջոն Հարվի Քելլոգը և նրա եղբայր Վիլլ Քիտ Քելլոգը, եգիպտացորենի ալյուրից ինչ-որ ուտեստ են պատրաստելիս եղել, երբ նրանց անհրաժեշտ է եղել առողջարանի որոշակի անհետաձգելի գործերի պատճառով դադարեցնել ուտեստի պատրաստումը: Երբ նրանք վերադարձել են հայտնաբերել են, որ եգիպտացորենի ալյուրը փչացել է: Քանի որ նրանց բյուջեն խիստ սահմանափակ է եղել, Քելլոգի եղբայրները, այնուամենայնիվ, որոշել են օգտագործել այդ ալյուրը։ Նրանք խմոր են հունցել, բայց այն շաղվել է և ստացվել են փաթիլներ ու գնդիկներ: Եղբայրները հուսահատությունից որոշել են բովել այդ փաթիլները, և պարզվել է, որ դրանց մի մասը դարձել է օդային, իսկ մյուս մասը խռթխռթան տեսք է ընդունել: Արդյունքում այդ փաթիլներն առաջարկվել են դոկտոր Ջոն Հարվի Քելլոգի հիվանդներին որպես նոր ուտեստ, և մատուցվել կաթով և զեֆիրով, որը դուր է եկել այն ճաշակողներին: Փաթիլներին շաքարավազ է ավելացրել եղբայրը՝ Վիլլ Քիտ Քելլոգը, որից էլ դրանց համը շատ ավելի հաճելի ու ընդունելի է դարձել:
Արդյունքում 1894 թվականին օրիգինալ եգիպտացորենային փաթիլները արտոնագրվել են ամերիկացի բժիշկ Ջոն Հարվի Քելլոգի կողմից: 1906 թվականին Քելլոգները, հիմնելով սեփական ընկերությունը՝ Kellogg’s-ը, որը մինչ օրս էլ հանդիսանում է եգիպտացորենի փաթիլների և չոր նախաճաշերի արտադրության առաջատարը ամբողջ աշխարհում, սկսել են այդ նոր տեսակի սննդամթերքի զանգվածային արտադրությունը: Նշենք, որ ներկայումս նմանատիպ փաթիլներ պատրաստվում են նաև ցորենի, բրնձի, վարսակի և այլ մշակաբույսերի հատիկներից: Եգիպտացորենի փաթիլների պատրաստման տեխնոլոգիան ներառում է եգիպտացորենի հատիկներից թաղանթների հեռացումը, սաղմերի առանձնացումը, հատիկի ստացումը, ինչին հաջորդում է վերջինիս եփումը աղաշաքարավազային օշարակի մեջ, որից հետո բարակ շերտերի պատրաստումը և 140 °C ջերմաստիճանում բովումը վառարաններում՝ մինչ խռթխռթան դառնալը: Պատրաստի փաթիլները կարելի է պատել գլազուրով, ինչպես նաև լցոնել ընկույզով, ցուկատով, հրուշակեղենի փշուրներով և այլն: Եգիպտացորենի փաթիլները կարելի է օգտագործել որպես ինքնուրույն սննդամթերք, սակայն, որպես կանոն, այն օգտագործում են ավելացնելով սառը կաթ: Մեր օրերում եգիպտացորենի փաթիլները համարվում է միջազգային սննդամթերք, որը հատկապես երեխաների համար սիրելի քաղցրավենիք է:
Նյութը հրապարակման պատրաստեց Կամո Խաչիկյանը
