Նիկոլի «հայելային աշխարհը»
ՎԵՐԼՈՒԾՈՒԹՅՈՒՆՆԵՐ
Գուցե զարմանալի թվա, բայց դեկտեմբերի 22-ի ընդդիմության հրավիրած հանրահավաքին ընդառաջ, փաշինյանական միտքն այլ բան չէր կարողացել հորինել, քան իրեն որպես «Հայաստանի և Արցախի արտաքին անվտանգության» երաշխավոր ներկայացնելը։ Շատերի համար ուղղակի զավեշտ էր, առավել շատերի համար՝ սրբապղծություն՝ 2020 թվականի նոյեմբերի 9-ից հետո վարչապետին տեսնել արտաքին անվտանգության երաշխավորի նոփ-նոր պատմուճանով։ Իրականում պարզվում է, որ Նիկոլ Փաշինյանի համար դա նաև «առաքելություն» է։ Իսկապես, ինչո՞վ առաքելություն չէ, եթե ներքին բոլոր խնդիրներն ու ներքաղաքական լարված իրավիճակը մի կողմ թողած՝ մարդն ահա այդպիսի գլոբա՛լ խնդիրներ է լուծում։ Ինքը գլոբա՜լ մտածող է, գլոբա՜լ խաղացող, հետևաբար, ընդդիմության մի հանրահավաքն ի՞նչ է, թեկուզ իր քթի տակ կազմակերպվող, որ շեղի մեծն «գլոբալիստի» տիեզերական ուշադրությունը։
Բայց չնայած գլոբալ գործչի այս հովերին ու նոփ-նոր պատմուճանին՝ միանգամայն ակնհայտ է այն մանրախնդրությունը, որով այդ մարդն իր գրառմամբ ուզում է «խփած» լինել հանրահավաքին։ Արձանագրենք, որ հիշյալ մանրախնդրությունը նաև մանկամտության է վերածվում, երբ հստակ է դառնում, որ Նիկոլն իրեն այլևս այնքան իշխանություն չի զգում, որ իր դատողություններում շփոթում է ընդդիմության ու իշխանության տեղերը։ Թե ընդդիմությունն ինչպե՛ս է աշխատանքից ազատելու, ասենք, որևէ դպրոցի ուսուցչի կամ տնօրենի, որևէ նախարարության որևէ աշխատակցի՝ անհնար է պատկերացնել, բայց Նիկոլի սահման չճանաչող երևակայությունը դա պատկերացնում է։
Նիկոլի ֆեյսբուքյան աճպարարության ամենազավեշտալի հատվածը, սակայն, մնում է այն պնդումը, թե մինչ ընդդիմությունն զբաղված է «էլիտար» իշխանազավթման դավաճանական փորձեր անելով, Նիկոլն իր հայրենանվեր իշխանախմբով «կենտրոնացած է արտաքին անվտանգության խնդիրների սպասարկմամբ»։ Փաստորեն, այս իշխանությունն արդեն գիտի՝ ինչ է արտաքին անվտանգության խնդիրը, և նույնիսկ «կենտրոնացել» է դրանց վրա։ Քիչ է մնում՝ մարդը հայտարարի, թե նախօրեին ինքը զորախմբով Սյունիքում էր, որպեսզի զբաղվեր վերոնշյալ «սպասարկման» աշխատանքներով։ Ափսոս միայն, որ սյունեցիները եղան այնքան անշնորհակալ, այնքան ապերախտ, որ ոչ միայն չթողեցին խեղճ հայրենանվերին՝ իր «սպասարկումն» իրականացնել, այլև նույնիսկ վտարեցին այնտեղից։
Անդրանիկ Կիրակոսյան
