Ով կմտածեր, որ Հայաստանում պիտի գա իշխանություն, որի երազանքը պետք է լինի Հայաստանն Ադրբեջանի գաղութ դարձնելը․ Ռազմիկ Դավոյան (տեսանյութ)
ՀԱՍԱՐԱԿՈՒԹՅՈՒՆԵս չեմ ողջունել այս իշխանությունների իշխանության գալը, դա աղետ էր։ Այս իշխանությունները վայրկյան առաջ պետք է հեռանան։ Այս մասին Հանրապետության հրապարակում Նիկոլ Փաշինյանի հրաժարականի պահանջով հանրահավաքի ընթացքում հայտարարեց հրապարակախոս, բանաստեղծ Ռազմիկ Դավոյանը։
Նա նշեց՝ ով կմտածեր, որ գալու է իշխանություն, որ ժողովրդի սերը, նվիրումը ոտնատակ տալով՝ կդավաճաներ Արցախին․ «Ես որևէ ժողովրդի նկատմամբ ատելություն չունեմ, ես ատելություն ունեմ ոճրագործ իշխանությունների հանդեպ։ Ով կմտածեր, որ Հայաստանում պիտի գա իշխանություն, որի երազանքը պետք է լինի Հայաստանը դարձնել Ադրբեջանի գաղութ և դրա միջոցով՝ դարձնել նաև Թուրքիայի գաղութ։ Պետք է հեռանան ամբողջ վարչակազմով․ ո՛չ նրանց ներկայությանը»,-ասաց նա։
Դավոյանի խոսքով՝ Հայաստանի փրկության շարժման համար ամբողջ հայ ժողովուրդը պետք է ոտքի կանգնի․ «Բարձրացեք ոտքի, դուք ծնկի գալու ժողովուրդ չեք։ «Հայրենիքի փրկության շարժման» վարչապետի թեկնածու Վազգեն Մանուկյանի կենսագրությունն անստվեր է, ոչ մեկը նրա կենսագրության մեջ բիծ չի կարող գտնել, բայց նշանակալից պետական գործեր կարող են գտնել, ինչքան ցանկանան»,- հայտարարեց նա՝ նշելով, թե Մանուկյանը մենակ չէ, զորավոր խումբ է կանգնած թիկունքին։
Հիշեցնենք, որ կապիտուլյացիոն ակտի ստորագրումից հետո քաղաքացիները երթեր և հանրահավաքներ են անում՝ պահանջելով Փաշինյանի հրաժարականը։ Այսօր տեղի են ունենում գործադուլներ և դասադուլներ։
Հիշեցնենք, որ Նիկոլ Փաշինյանը, ՌԴ նախագահ Վլադիմիր Պուտինը և Ադրբեջանի նախագահ Իլհամ Ալիևը ստորագրել են համաձայնագիր, որով Ադրբեջանին են անցնում Արցախի 7 շրջանները, Շուշին և Հադրութը, ինչպես նաև գյուղեր՝ Ասկերանի ու Մարտունու շրջաններից, ինչպես նաև Մարտակերտի շրջանի Թալիշ և Մատաղիս գյուղերը։ Նիկոլ Փաշինյանի այս որոշումն ու քայլը վրդովվեցրել է քաղաքացիներին։
