Քաղաքապետարանի մի խումբ աշխատակիցների համար սեփական գրպանն ավելի կարևոր է
ՔԱՂԱՔԱԿԱՆՈՒԹՅՈՒՆ
Արդեն մի քան օր է Երևանի քաղաքապետարանի մոտ բողոքի ակցիաներ են կազմակերպվում: Ցուցարարները` օգտվելով առիթից, որոշել են Փաշինյանի հրաժարականին զուգահեռ պահանջել նաև քաղաքապետ Հայկ Մարությանի հրաժարականը:
Այսօր էլ լրատվամիջոցներով տեղեկություններ են տարածվել այն մասին, թե իբր քաղաքապետարանում «բունտ է տեղի ունեցել՝ քաղաքապետի հրաժարականի պահանջով»: Այս առիթով Երևանի քաղաքապետի մամուլի խոսնակ Հակոբ Կարապետյանը, պարզաբանելով քաղաքապետարանում տեղի ունեցած իրադարձության դրդապատճառները, ֆեյսբուքյան գրառում է արել և մանրամասնել տեղի ունեցածը.
«Իրականությունը հետևյալն է. Երևանի քաղաքապետ Հայկ Մարությանը, հաշվի առնելով համավարակի և պատերազմի հարուցած իրավիճակը, այս տարվա սեպտեմբերից նպատակահարմար չի համարում կիրառել պարգևավճարներ: Քաղաքապետարանի մի խումբ աշխատակիցներ՝ տեղեկանալով, որ տարեվերջյան պարգևավճարներ չեն լինելու, այսօր հավաքվել են քաղաքապետարանի միջանցքում՝ պահանջելով բաժանել պարգևավճարները: Քանի որ հավաքի պահին քաղաքապետը ներկա չի եղել (մեկնել է Տավուշ)՝ քաղաքապետարանի աշխատակազմի քարտուղարը աշխատակիցներին առաջարկել է քննարկումը շարունակել վաղը՝ քաղաքապետի ներկայությամբ»,- ներկայացրել է Կարապետյանը:
Ստացվում է, որ քաղաքապետի հանդեպ հերթական դեմարշի կազմակերպիչներին միայն իրենց գումարներն են պետք և այդ պատճառով էլ որոշել են բողոքի ակցիա կազմակերպել և այդ ամենը մամուլին ներկայացնել, թե Մարությանի հրաժարականն են պահանջում:
Ուշագրավ է, որ եթե Մարությանը որոշեր պարգևավճարներ վճարել, այս դեպքում էլ մամուլն աղաղակելու էր, թե այսքանից հետո քաղաքապետը դեռ հանդգնում է պարգևավճարներ վճարել: Ստացվում է, որ Երևանի քաղաքապետարանի մի խումբ աշխատակիցներ ոչ թե իրենց գործով են զբաղված, այլ սաբոտաժ կազմակերպելով, համոզված լինելով, որ երկու դեպքում էլ իրենց բարձրացրած աղմուկը կհանրայնացվի, ինչն էլ հերթական անգամ առիթ կդառնա դրսում կանգնածներին պահանջել Մարությանի հրաժարականը: Համաձայնեք, որ Մարությանի անվան շուրջ հերթական աղմուկը բարձրացնելու համար բավական պարզունակ սցենար է մշակված, որը խոսում է այն մասին, որ քաղաքապետարանի աշխատակիցներին միայն սեփական գրպանն է հետաքրքրում, որի համար պատրաստ են անտեսել համազգային սուգն ու երկրում առկա իրավիճակը:
Արմինե Գրիգորյան
