Լուծումները, որոնք ընդդիմադիր շրջանակները ներկայացնում են՝ չեն պատասխանում հիմնական հարցադրմանը. Սարո Սարոյան
ՔԱՂԱՔԱԿԱՆՈՒԹՅՈՒՆ
Քաղաքագետ Սարո Սարոյանի դիտարկմամբ Հայաստանում ներքաղաքական իրավիճակը վերջին շաբաթների դրությամբ ինչպես կար, շարունակում է նույնը մնալ: Եվ մի կողմից շարունակվող անորոշությունը, մյուս կողմից պետական կառավարման կաթվածահար վիճակում գտնվելը, բացի այդ,քաղաքական դաշտում շարունակվող ճգնաժամը օր-օրի խորանցում է իրավիճակը:
«Չկա վստահության մթնորոլտ և ցավոք այս օրերին այն չի էլ սպասվում, քանի որ խնդիրները ծնած պատճառները մնում են նույն մակարդակի վրա: Պայքարի նոր որակ ապահովելու համար բոլորովին այլ իրավիճակ, հանգամանքներ, կադրեր և ռեսուրսներ են պետք, որոնք չկան: Այդ է պատճառը, որ ճգնաժամը շարունակում է խորանալ»,- ասաց Ս. Սարոյանը:
Քաղաքագետի կարծիքով՝ թեև առանձին շրջանակներ փորձում են ընդդիմության կերպար ձևավորել և պայքարն իրենց վրա վերցնել, բայց իրականում Հայաստանում համախմբված ըննդիմադիր ճակատ չկա:
«Այստեղ կա մեծ մանիպուլյացիա, քանի որ ակնհայտ է, որ ընդդիմադիր հանրությունը կենտրոնացած չէ ոտքի ելած կուսակցության կամ քաղաքական ուժերի դաշինքի շուրջ: Այս աղճատված իրավիճակը նույնպես քաղաքական ճգնաժամի խորացման շարժառիթ ու գործոն է հանդիսանում: Բացի այդ, այն լուծումները, որոնք ընդդիմադիր այս կամ այն շրջանակներ ներկայացնում են, դրանք լուծումներ չեն, քանի որ չեն պատասխանում հիմնական հարցադրմանը, թե ինչ՞ից ելնելով հանրությունը պետք է իրենց վստահի: Այդ հարցի պատասխանը ստանալուց հետո գուցե հնարավոր լիներ որոշակի ազդեցության լծակներ ձեռք բերել»,- ասաց Ս. Սարոյանը:
Քաղաքագետը նշեց նաև, որ տարիներ շարունակ մեր երկրում ամեն ինչ արվել է, որ քաղաքական դաշտը չկայանա: Այդ թվում՝ գործող վարչակազմի կողմից: Իրականցվել է մի քաղաքականություն, որ մրցակյացին դաշտ չձևավորվի: Եվ այսօր էլ նույն դեմքերն ու նույն քաղաքական մշակույթն է շարունակվում, որը հանրության մոտ վստահություն չի առաջացնում:
«Հասարակությունը բոլոր դեմքերին ճանաչում է, ունի հիշողություն, որի արդյունքում չի վստահում քաղաքական շրջանակներին: Այսօր թե՛ իշխանության և թե՛ ընդդիմության հանդեպ վստահությունը կորցված է, որը վերականգնել հնարավոր չէ: Իմ կարծիքով՝ այս իրավիճակից դուրս գալու ելքը կլինի այն, որ բոլորը հանգեն եզրակացության, որ այսօրվա օրակարգը ոչ մի տեղ տանող ճանապարհ է: Պետք է դուրս գալ այդ շրջանակներից և երկրի կառավարման գործը վստահել անկուսակցական մասնագետների, որոնք ունենալով կառավարման փորձ և գիտելիք կկարողանան ճգնաժամային կառավարում իրականացնել և համախմբողի դեր կատարել: Այդ դեպքում կուսակցությունները իշխանությունում չեն փնտրի մրցակիցներ, երկրի պրոֆեսիոնալ կառավարում կիրականացվի, հիմքեր կստեղծվեն քաղաքական դաշտի ճգնաժամից դուրս գալու և արտահերթ խորհրդարանական ընտրություններ կազմակերպելու համար: Մնացած ճանապարհները է՛լ ավելի են խորացնելու ճգնաժամը»,- ասաց Ս. Սարոյանը:
Արմինե Գրիգորյան
