Ակնհայտ է, որ երկու երկրները ապակառուցողական քաղաքականություն են որդեգրել Հայաստանի նկատմամբ
ՔԱՂԱՔԱԿԱՆՈՒԹՅՈՒՆ
Քաղաքագետ Արմեն Վարդանյանը համոզված է, որ Ադրբեջանը և Թուրքիան չեն բավարարվելու եղածով և ո՛չ միայն աչքը չեն հեռացնելու Արցախից, այլև ակնհայտ է, որ ցանկություն ունեն Հայաստանից ևս կորզել այն ամենը, ինչ հնարավոր է: Ու թեև այս պահին այդ մասին չեն բարձրաձայնում, բայց ակնհայտ է, որ նեոօսմանիզմը այդպես էլ դուրս չի եկել Թուրքիայի արտաքին քաղաքական օրակարգից:
«Պատահական չէ, որ այս օրերին Թուրքիայում շատերը հայտարարում են, որ Քեմալ Աթաթուրքի՝ Թուրքիան Ադրբեջանի և Միջին Ասիայի հետ միավորվելու մասին միտքը շատ մոտ է իրականությանը: Ուստի ակնհայտ է, որ այս երկու երկրները ապակառուցողական քաղաքականություն են որդեգրել Հայաստանի նկատմամբ: Եթե այս երկու երկրներում այլ մտածելակերպ ունեցող լիդերներ լինեին, ապա հնարավոր կլիներ մտածել այս երկու երկրների հետ դիվանագիտական հարաբերություններ հաստատելու մասին: Բայց, այս պայմաններում, ակնհայտ կայսերապաշտական նկրտումներ ունեցող երկրների հետ դիվանագիտական հարաբերություններ հաստատելու մասին դեռևս վաղ է խոսել»,- ասաց Ա. Վարդանյանը:
Քաղաքագետի կարծիքով՝ միջազգային քաղաքականության մեջ մեկ հետքայլին հաջորդում է երկու քայլ առաջ գնալու հնարավորությունը: Համաշխարհային պատմության մեջ նմանօրինակ բազմաթիվ դեպքեր կան: Ուստի, պաշտոնական Երևանը պետք է հասկանա, որ Թուրքիան և Ադրբեջանը եղածով չեն բավարարվելու և փորձելու են ավելին պահանջել:
«Հարկավոր է շատ արագ վերականգնել Հայաստանի տնտեսությունը և բանակի մարտունակությունը: Եվ պետք է արագ կերպով մոբիլիզացնել բոլոր ուժերը, սպասվող մարտահրավերներին դիմակայելու համար: Պետք է հաշվի առնել նաև, որ Ադրբեջանի բանակը ևս շատ լուրջ կորուստներ է կրել և իրենք էլ չեն կարողանալու կորցրածը շուտ վերականգնել: Ուստի այսօր կարևոր է տնտեսությունը զարգացնել, որպեսզի տնտեսության զարգացման մրցավազքում հաղթող ճանաչվենք և կարողանանք մեր դիրքերն ամրապնդել նաև ռազմական ուղղությամբ»,- ասաց Ա. Վարդանյանը:
Արման Դուրյան
