Առաջին զիջումը կլինի, եթե ագրեսիայից հետո համաձայնենք կարգավորել Թուրքիայի հետ հարաբերությունները
ՔԱՂԱՔԱԿԱՆՈՒԹՅՈՒՆ
ԳԱԱ թղթակից անդամ, թուրքագետ Ռուբեն Սաֆրաստյանի կարծիքով, մինչև Թուրքիայի ԱԳ նախարարի հայտարարությանը պաշտոնապես արձագանքելը պետք է հասկանալ, թե առհասարակ Թուրքայի քաղաքականությունը Հայաստանի նկատմամբ ինչ հիմնադրույթների վրա է հիմնվում: Այդ ամենով հանդերձ, պետք է նաև հաշվի առնել նաև, որ Թուրքիայից եկող հայտարարությունները աշխարհաքաղաքական իրողություններից են բխում: Ուստի հարկավոր է բավականին ուշադիր լինել և չշտապել:
«Պետք է նկատել, որ ըստ թուրքական կողմի վերլուծությունների փորձ է արվում ներկայացնել, որ ավելի շատ Հայաստանն է կախված Թուրքիայից, քան Թուրքիան Հայաստանից: Բացի այդ, Թուրքիան բոլոր առիթներն օգտագործելով փորձում է ցույց տալ, որ ինքը ցանկանում է, որ Հայաստանը դադարի լինել Արցախի երաշխավորը: Ուստի, ակնկալում են զիջումներ նաև այս ուղղությամբ: Այդ համատեքստում, առաջին զիջումը կլինի այն, որ մենք Թուրքիայի կողմից ցուցաբերած ագրեսիայից հետո համաձայնենք կարգավորել Թուրքիայի հետ հարաբերությունները»,- 1or.am-ի հետ զրույցում ասաց Ռ. Սաֆրաստյանը:
Մյուս զիջումները, ըստ Սաֆրաստյանի, որի մասին Թուրքիան դեռ չի բարձրաձայնում, վերաբերում են Ցեղասպանության ճանաչման հարցը բարձրացնելուն և Հայստանի կողմից 1921-ին կնքված Կարսի պայմանագրին հավատարիմ մնալու մասին հայտարարությանը:
«Այսինքն Չավուշօղլուի հայտարարությունները պետք է այս երեք կետերի համատեքստում դիտարկել: Այսինքն՝ Թուրքիան սպասում է, որ Հայաստանը գնա զիջումների: Ուստի, այս պայմաններում Թուրքիայի հետ երկխոսության մասին խոսել ընդհանրապես իմաստ չունի: Պետք չէ անտեսել նաև այն փաստը, որ Արցախի դեմ սանձազերծված պատերազմը ուղղված էր նաև Հայաստանի դեմ: Ամեն դեպքում, Հայաստանի դեմ վարվող քաղաքականությունը պետք է դիտարկել նախորդ դարից սկսված և մինչ օրս շարունակվող մարտահրավերների շարունակականության տեսանկյունից: Այսինքն՝ հարկավոր է Ցեղասպանության ճանաչման քաղաքականությունը շարունակել ավելի ինտենսիվորեն: Եվ եթե մենք կարողանանք ավելի հմուտ քաղաքականություն վարել, ապա, կարծում եմ, ավելի շատ աջակիցներ կունենանք, քան հիմա ունենք»,- ասաց Ռ. Սաֆրաստյանը:
Մարիամ Պետրոսյան
