Լավրովը նշել է վերջին 15 տարվա ընթացքում ՌԴ արտաքին քաղաքականության գլխավոր իրադարձությունը
ՄԻՋԱԶԳԱՅԻՆ
Արևմուտքի գիտակցումն առ այն, որ Ռուսաստանն անկախ տերություն է, որի համար միշտ առաջնահերթ կլինեն իր ազգային շահերը, ամենակարևոր բանն է, որ պատահել է Ռուսաստանի արտաքին քաղաքականության մեջ վերջին 15 տարվա ընթացքում: Այս մասին ռուսական RT հեռուստաալիքին տված հարցազրույցում ասել է ՌԴ արտգործնախարար Սերգեյ Լավրովը:
«Դժվար է որևէ իրադարձություն առանձնացնել այն ամենից, ինչ տեղի է ունեցել կամ շարունակում է տեղի ունենալ: Հավանաբար, կուտակային ազդեցություն է եղել Արևմուտքի գիտակցումը, որ Ռուսաստանն, ամեն դեպքում, անկախ տերություն է: Եվ որ Ռուսաստանը միշտ կունենա առաջին հերթին իր ազգային շահերը, որոնք պատրաստ է ազնվորեն և հավասարապես համապատասխանեցնել ցանկացած այլ երկրի ազգային շահերին միջազգային իրավունքի հիման վրա, բայց որոնք երբեք չեն կեղծվի», -ասել է Լավրովը:
Նրա խոսքով` սա հավանաբար «վերջին 15 տարիների ընթացքում ամենագլխավոր բանն է, որը տեղի է ունեցել Ռուսաստանի արտաքին քաղաքականության մեջ և այն լրատվամիջոցների հարթակում, որոնք լուսաբանում են Ռուսաստանի և Արևմուտքի հարաբերությունները»:
«Եվ այս ժամանակահատվածը դեռ ավարտված չէ: Միևնույն է, մեր արևմտյան գործընկերները փորձում են Ռուսաստանին զրկել իր ապագան ինքնուրույն որոշելու իրավունքից: Ռեժիմի փոփոխության տարբեր սցենարներ առաջ քաշելու փորձեր են անում: Դա արդեն գրեթե ոչ ոք չի թաքցնում»,-ավելացրել է Լավրովը:
Նախարարի խոսքով ՝ Արևմուտքն ամեն ինչ անում է, որպեսզի Ռուսաստանի արտաքին քաղաքականությունը «դրական արդյունքների չհասնի», այդ թվում ՝ իր մերձավոր միջավայրում:
«Ցավոք, մենք դրան վերաբերվում ենք որպես իրողության», -եզրափակել է խոսքը Լավրովը:
