Bloomberg-ը կազմել է COVID-19-ի պատվաստանյութերի պահանջարկի վարկանիշը
ՀԱՍԱՐԱԿՈՒԹՅՈՒՆ
rbc.ru-ն գրում է, որ Աշխարհում կորոնավիրուսային պատվաստանյութերի նախնական պատվերներ ամենաշատը ստացել է բրիտանական AstraZeneca ընկերությունը: Դա բխում է Bloomberg-ի վարկանիշից, որը կազմվել է Airfinity Ltd հետազոտական ընկերության և Օքսֆորդի համալսարանի տվյալների հիման վրա:
Գործակալությունը նշում է, որ AstraZeneca-ի պատվաստանյութերի գնումների պատվերների ավելի քան 40% -ը կամ 2.4 միլիարդ դեղաչափ, բաժին են ընկնում միջին և ցածր եկամուտ ունեցող երկրներին: Համեմատության համար. ԱՄՆ-ը պատվիրել է այս դեղամիջոցի 300 միլիոն դոզա, եվրոպական երկրները` 505,3 միլիոն դոզա: AstraZeneca պատվաստանյութի միջին արդյունավետությունը 70% է, այն դեպքում, որ ԱՄՆ-ի Pfizer-ի և Moderna-ի պատվաստանյութի դեպքում այն 95% է:
Ինչպես նշում է Bloomberg-ը, այդ պահանջարկը պայմանավորված է AstraZeneca-ի պատվաստանյութերի հասանելիությամբ: Ընկերությունը հայտնել է, որ համաճարակի ընթացքում մտադիր չէ օգուտ քաղել պատվաստանյութից և մեկ դոզայի գինը սահմանել է 4-5 դոլլար: Համեմատության համար նշենք, որ Pfizer–ի պատվաստանյութի դոզայի արժեքը ԱՄՆ–ի համար կազմել է 19,5 դոլլար (ընդհանուր 39 դոլլար երկու բաղադրիչի ներարկման համար), իսկ Moderna–ինը՝ 32-37 դոլլար է:
Բացի այդ, AstraZeneca պատվաստանյութը ևս մեկ մեծ առավելություն ունի, նշել է գործակալությունը: Այն կարելի է պահել սառնարանային ջերմաստիճանում, իսկ Pfizer և Moderna պատվաստանյութերը պահանջում են ավելի ցածր ջերմաստիճան՝ -70 աստիճան ցելսիուսի:
Կորոնավիրուսային պատվաստանյութի նախնական պատվերների քանակով երկրորդ տեղը պատկանում է ամերիկյան Novavax արտադրողին (1,4 միլիարդ դեղաչափ, որից 160 միլիոնը՝ ԱՄՆ-ում, 100 միլիոնը՝ Եվրոպայում), երրորդը Johnson & Johnson-ն է (1,3 միլիարդ դեղաչափ, որից 430 միլիոնը ԱՄՆ, 300 միլիոն՝ եվրոպական երկրներ):
Ռուսական Sputnik V պատվաստանյութը Bloomberg-ի վարկանիշում յոթերորդն է 537,4 միլիոն դեղաչափի պատվերով: Այս պատվաստանյութը չեն գնում եվրոպական երկրները և ԱՄՆ-ը: Ռուսաստանն արդեն իսկ գրանցել է կորոնավիրուսի դեմ երկու պատվաստանյութ՝ «Sputnik V»-ն և «EpiVacCorona»-ն: Երկրում ընթանում են կամավորների մասնակցությամբ պատվաստանյութերի հետհաշվառումային հետազոտություններ:
Նյութը հրապարակման պատրաստեց Կամո Խաչիկյանը
