Արարատ Միրզոյանը կոչ էր անում ինչ–որ մեկի հետ «չշշկռել» գերագույն հրամանատարին. Արփինե Հովհաննիսյան
ՎԻԴԵՈԱյս տարիների ընթացքում Նիկոլ Փաշինյանը ցույց տվեց, որ սեփական խայտառակ ձախողումների մեջ մարդկանց մեղադրելուց բացի այլ բանի ունակ չէ։ Այս մասին NEWS.am-ի հետ զրույցում ասաց Արդարադատության նախկին նախարար Արփինե Հովհաննիսյանը՝ անդրադառնալով վարչապետի ուղիղ եթերում արված հայտարարությանը, թե նախկին իշխանություններն են ձախողել դիվանագիտությունը, իսկ իր իշխանությունը նախկինների ձախողումների բեռի տակից դուրս գալու փորձերն է ձախողել։
«Նա հերթական անգամ անամոթաբար ստում է, քանի որ նախկին իշխանություններին մեղադրելով պետք է ցույց տա գեթ մեկ փաստաթուղթ, որտեղ եղել են նման խայտառակ ձևակերպումներ, որտեղ եղել է Շուշիի, Հադրութի հանձնման վերաբերյալ դրույթ, որտեղ եղել է Սյունիքի մարզում բազմաթիվ տարածքների հանձնման, Սոթքի՝ Հայաստանի տարածքի հատվածից հանձնման կամ Սյունիքով անցնող միջանցքի մասին որևէ դրույթ: Նա լավ կանի ցույց տա, բավական է ուղղակի մեղադրել, ընդ որում՝ եթե նույնիսկ իրեն թողած լինեինք ինչ–որ վատ փաստաթուղթ, որն այդպես չի, որտեղ ինքը երկուսուկես տարում ձախողել էր դրա շտկումը և որը հանգեցրել է նման ողբերգության, դա նշանակում էր, որ ինքը պետք է հեռանա՝ լուռ, գլխիկոր, հասկանալով, որ ինքը հայ ժողովրդի առաջ մեծ մեղք է գործել՝ անկախ նրանից՝ մարդիկ դա այս պահին գիտակցում, ընդունում են, թե ոչ, իր կողքն են, թե ոչ։ Փաստը մնում է փաստ, որ նա ծախել է մեր հայրենիքը անգրագիտության, ապիկարության, անհավասակշիռ վարքի պատճառով և նաև տարրական կանոնները չիմանալու պատճառով»,– ասաց Արփինե Հովհաննիսյանը։
Վարչապետն այսօր մի ուշագրավ հայտարարություն էր արել, թե մարտերում ձախողումների համար պատասխանատվությունը դնում են իր վրա, և նշել էր, թե «վարչապետը մա՞րտ է ղեկավարել, միանձնյա որոշո՞ւմ է կայացրել»։ Արփինե Հովհաննիսյանի դիտարկմամբ՝ այս հայտարարությամբ Փաշինյանը փորձեց պարտության պատասխանատվությունը դնել Զինված ուժերի վրա։
«Նա և Արցախի նախագահի նախկին սիմվոլ Արայիկ Հարությունյանը բանակին, զինվորին մեղադրելուց բացի ոչինչ չեն անում։ Փաշինյանը բոլորի վրա մեղքը կբարդի, բայց իր վրա պատասխանատվություն չի վերցնի։ Հարգելի պարոն Փաշինյան, ախր Դուք գերագույն գլխավոր հրամանատար եք, որին ինչ–որ մեկի հետ չշշկռելու կոչ էր անում ձեր ԱԺ–ի նախագահը, իսկ գերագույն գլխավոր հրամանատարը երկու ֆունկցիա ունի՝ ինքը պիտի մոբիլիզացներ ամբողջ պետության ռեսուրսը, իսկ ինքը մարդկանց թողեց կամավորների հույսին, 18 տարեկան երեխաներին տարավ ԱԹՍ–ների տակ սպանեց, քաջ գիտակցելով՝ ինչ պատերազմ է սա, երկրորդ գործառույթը, որը նա ձախողել է՝ այն է, որ պատերազմը չկանգնեցրեց ՝ գիտակցելով, թե Հայաստանը ինչ քաղաքական, դիվանագիտական, սոցիալական, ռազմական և բոլոր ոլորտներում ինչ ռեսուրսներ ունի, հետևաբար ոչ մի կերպ չի ստացվի իր ուսերից մեղքը բարդել ինչ–որ մեկի վրա վրա։ Մարդ պետք է տղամարդկություն ունենա՝ իր սխալների պատասխանատվությունն իր վրա վերցնելու համար»,– նշեց նա։
«Հայրենիքի փրկության շարժումը» հայտարարեց, որ իրենց վարչապետի միասնական թեկնածուն Վազգեն Մանուկյանն է։ Այդ թեկնածությունը շատ քննադատվեց։ Արդարադատության նախկին նախարարը Վազգեն Մանուկյանի թեկնածությանը կողմ է, շեշտում է՝ պատերազմը չի ավարտվել, մենք այսօր անվտանգության խնդիր ունենք, թուրքը Հայաստանում է, իսկ նա կարող է անվտանգություն ապահովել։
«Փաշինյան Նիկոլը ամենամեծ վատությունը որ արել է՝ մեզ բաժանելն է սևերի ու սպիտակների, ներկա ու նախկինների , թալանչիների և ոչ թալանչիների միջև, ընդ որում՝ ամենանախկինն ինքն էր։ Հիմա մեզ պետք է մարդ, ով ունի պետական կառավարման համակարգի մասին պատկերացում, փորձառություն, ով կարող է այս պահին բանակցել, որովհետև եթե մի անգամ թուրքի առաջ ծնկի ես եկել, երկրորդ անգամ ծնկի իջնելն անխուսափելի է։ Կարծում եմ, որ Վազգեն Մանուկյանը իր ամբողջ կենսագրության ընթացքում ցույց է տվել, որ ինքը սուր եզրերը հարթող է և ոչ թե բոլորին իրար հետ թշնամացնող։ Այս պահի դրությամբ ճիշտ թեկնածություն է, մի անգամ ժողովուրդն անմնացորդ սիրեց մեկին և մենք տեսանք, թե էդ սիրո արդյունքում ինչ եղավ»,– ասաց նա։
Նիկոլ Փաշինյանի հրաժարականի հարցում քաղաքական ուժերը միաձայն են, բայց վարչապետի թեկնածուի հարցում՝ ոչ։ «Լուսավոր Հայաստան» խմբակցության վարչապետի թեկնածուն Էդմոն Մարուքյանն է։ Արփինե Հովհաննիսյանը հույս ունի, որ ԼՀԿ–ն կտեսնի՝ ժողովուրդը փողոցում հավաքվել է ոչ թե Էդմոն Մարուքյանի համար, այլ Նիկոլ Փաշինյանի հեռանալու և կոնկրետ թեկնածուի համար։
«Հուսով եմ, որ կգա այն գիտակցումը , երբ նրանք պետք է միավորվեն, որովհետև չեմ կարծում, որ սա այն պահն է որտեղ պետք է փորձես երկու կողմերից յուրաքանչյուրին էլ թանկ ներկայացնես քեզ, որովհետև եթե «Իմ քայլը» կարողանա պահպանել Նիկոլ Փաշինյանին, ապա կպահպանի նրան, բայց, եթե ստիպված լինի ընտրել այլ վարչապետ ու ընտրի էդմոն Մարուքյանին, դա նշանակում է, որ ինչ–որ առումով Նիկոլ Փաշինյանն ու Էդմոն Մարուքյանը հավասար հարթության վրա են իմքայլականների համար։ Երբ իրենք հանդես են գալիս վարչապետի հրաժարականի պահանջով, հույս ունեմ, որ դա ոչ թե երրորդ ճանապարհ է դեպի Էդմոն Մարուքյանի վարչապետություն՝ Նիկոլ Փաշինյանի թույլտվությամբ, այլ ընդամենը Էդմոն Մարուքյան քաղաքական գործչի կարևորության ընդգծում է և ոչ ամենևին համագործակցություն Նիկոլ Փաշինյանի հետ»,– ասաց նա։
Արփինե Հովհաննիսյանի դիտարկմամբ՝ եթե ոստիկանությունը, իրավապահ մարմինները ենթարկվեն Նիկոլ Փաշինյանի քմահաճույքներին, ապա արյունը անխուսափելի կլինի։
«Բայց ես տեսնում եմ, որ ժողովրդի ցասումն ավելի ու ավելի է մեծանում, նա չի թողնում, որ երկիրը խաղաղվի, և երկիրը խաղաղ չի լինելու, քանի դեռ ինքը չի գնացել, հետևաբար մարդիկ հասկանում են, ինչպես օրինակ՝ Արմեն Սարգսյանը վերջերս ոստիկանությանը կոչ էր անում զերծ մնալ սադրիչ և բռնությանն ուղղված գործողություններից։ Կարծում եմ՝ ոստիկանությունը կկանգնի ժողովրդի կողքին՝ իր հայրենիքի համար և բռնություն չի լինի և Նիկոլ Փաշինյանը կհեռանա իր կամքին հակառակ, ինչը ներառում է նաև անցնցում հեռացում»։
