Ադրբեջանական ամեն մի զիբիլ մի´ բերեք հայկական տիրույթ. Հայկ Դեմոյան
ՀԱՍԱՐԱԿՈՒԹՅՈՒՆ
Արցախի դեմ սանձազերծված թուրք-ադրբեջանական ահաբեկչական պատերազմի ընթացքում և ավարտից հետո սոցիալական ցանցերում ակտիվ շրջանառվում են հայ գերիների նկարներ, տեսանյութեր, որոնք հիմնականում ադրբեջանական կողմի մեկնաբանություններով են ուղեկցվում: Ուշագրավ է, որ մեր գերիների նկարները սկսեցին շրջանառվել նաև սոցիալական ցանցի հայկական տիրույթում:
Ի դեպ, զոհվածների, գերեվարվածների լուսանկարները շրջանառելը արգելվում է միջազգային օրենքներով, քանի որ այն անձնական տվյալների գաղտնիության պահպանման կոպիտ խախտում է: Եվ եթե ադրբեջանական կողմը նման հոլովակներն ու նկարները դարձնում է քարոզչական նյութ և սկսում է դիվիդնենտներ շահել, ապա հայկական կողմը և առանձին անհատներ պետք է զերծ մնան նման նյութերը տարածելուց, քանի որ դրանով ոչ միայն ջուր են լցնում հակառակորդի ջրաղացին, այլև՝ խախտում են գերության մեջ հայտվածի ու նրա հարազատների իրավունքները: Ուշագրավ է, նաև, որ վերջին շրջանում հայկական տիրույթում սկսել են նաև ակտիվ շրջանառել և քննարկել ալիևյան քարոզչամեքենայի կողմից դաշտ նետվող բարձրաստիճան պաշտոնյաների հայտարարությունները ևս, ինչը կրկին ադրբեջանական խայծը կուլ տալու կամ այլ կերպ ասած՝ մեդիագրագիտության պակասի նշան է: Այս հարցի կարևորությունը չի շրջանցել նաև Հայոց ցեղասպանության թանգարան-ինստի-տուտի նախկին տնօրեն, պատմաբան Հայկ Դեմոյանը, որն անդրադառնալով նշված երևույթին ֆեյսբուքյան իր էջում գրել է.
«Ադրբեջանական ամեն մի զիբիլ մի´ բերեք հայկական տիրույթ ու մի´ զբաղվեք շարունակական ինքնախարազանմամբ։ Խոցելի ու նվաստացած ներկայանալու փոխարեն մեր զինվորների ու սպաների նկարները դրեք ու փառաբանեք իրենց գործը պատվով կատարած հայորդիներին։ Պատերազմի բովով անցած հայ զինվորականն այսօր ամենաթանկ մարդկային ռեսուրսն է մեզ համար։ Իսկ Բաքվում ինչ տխմարություն ասես կհայտարարեն ու կասեն, պարտադի՞ր է դրանք շրջանառել որպես թեժ լուր կամ ցնցող նորություն։ Մի´ մոռացեք, զինադադար դեռ չի կնքվել, ոչ էլ խաղաղության համաձայնագիր կա։ Որքան խոցելի ու վախեցած ես ներկայանում, այդքան էլ կխոցեն ու կվախեցնեն քեզ։ Փոխարենը հիշեցրեք, որ տաս հազարից ավելի զոհ տված ադրբեջանական բանակն ընդամենը ամրապնդել է Ալիևների իշխանությունը, սակայն տանուլ է տվել Ադրբեջանի և ցանկացած պետության համար ամենակարևորը՝ ինքնիշխանությունը։ Իսկ դա լուրջ հետևանքներ է ունենալու մոտ ապագայում»։
Արմինե Գրիգորյան
