Գերեվարվածների մասին տեղեկություններ հրապարակելը՝ մարդու իրավունքների խախտում
ՔԱՂԱՔԱԿԱՆՈՒԹՅՈՒՆ
Արցախի ԿԽՄԿ խոսնակ Էթերի Մուսաելյանն անդրադառնալով Արցախի դեմ սանձազերծված թուրք-ադրբեջանական ահաբեկչկան պատերազմի հետևանքով գերեվարված անձանց և, առհասարակ առաքելության գործառույթներին, նշեց որ առաքելության խնդիրն է այս կամ այն կողմում հայտնված անձանց մասին տեղեկությունների ճշտումը, նրանց պահման վայրի, առողջական խնդիրների ուսումնասիրությունը: Բացի այդ, կոմիտեն հնարավորություն է ընձեռում գերիներին կապ հաստատել իրենց հարազատների հետ:
«Մենք այն ինչ տեսնում ենք` ներկայացնում ենք մեր ղեկավարությանը և հանրությանը, չենք պատմում, թե ինչ ենք տեղում տեսնում: Մեր այցելությունները և դիտարկումները զուտ մարդասիրական և հումանիտար բնույթ են կրում, ուստի մենք չենք կարող այս կամ այն կողմին ստիպել, որպեսզի ազատ արձակեն գերեվարվածին»,- 1or.am-ի հետ զրույցում ասաց Է. Մուսաելյանը:
Նրա տեղեկացմամբ գերիներին ազատ արձակելու մասին որոշումները կայացվում է միայն տվյալ երկրի ղեկավարությունը: Եվ երբ նման որոշում է կայացվում, ապա կազմակերպությունը նպաստում է վերադարձի կազմակերպմանը: Նա նաև խորհուրդ տվեց, անհայտ անձանց կողմից գերեվարվածի մասին որևէ զանգի կամ տեղեկություն դեպքում համացանցում նկարներ չտեղադրել և դրա փոխարեն դիմել կազմակերպությանը կամ պատկան մարմիններին, որպեսզի կազմակերպությունը հնարավորություն ունենա օպերատիվ գործելու: Նման մարդկանց տվյալները հրապարակելը մարդու իրավունքների խախտում է, ուստի նման անձանց պետք է հեռու պահել հասարակության հետաքրքրություններից, քանի որ նրանց մասին տեղեկություններ հայտնելը կամ շրջանառելը կարող է վնասել ոչ միայն գերիներին, այլև ողջ գործընթացին:
Արմինե Գրիգորյան
