Հայաստանի շուրջ տեղի ունեցող իրադարձությունները՝ սթափության կոչ է, որին ուշադրություն չի դարձվում
ՔԱՂԱՔԱԿԱՆՈՒԹՅՈՒՆ
Արցախյան պատերազմի հետևանքները դեռ չեն վերացվել, բայց դրան զուգահեռ, ամեն կերպ փորձ է արվում Հայաստանում սկսված բողոքի ալիքը թեժ պահել: Բողոքի ակցիաներ են իրականացնում անհայտ կորածների ու գերեվարվածների հարազատները, բանակում ծառայության մեջ գտնվող զինծառայողների ծնողները, մշակութային գործիչները: Բոլորն իրավացիորեն ունեն իրենց պահանջն իշխանություններից, բայց, Ադրբեջանն օգտվելով ստեղծված իրավիճակից, շարունակում է իր նենգ քաղաքականությունն իրականացնել և հնարավորն ու անհնարինը խլել հայկական կողմից: Այս խառը իրավիճակում, երբ բոլորն իշխանություններից պահանջելով են զբաղված, Հայաստանի սահմաններից դուրս՝ հարևան երկրներում, իրադարձություններ են տեղի ունենում, որոնք մեծ հաշվով, կարծես, անտեսվում են շատերի կողմից:
Օրերս Իրանում սպանվեց միջուկագետ-ֆիզիկոս Մոհսեն Ֆահրիզադեն, որի սպանության համար վրեժխնդիր լինելու Իրանի խոստումից հետո անցյալ շաբաթ Իսրայելը ամբողջ աշխարհում իր դեսպանատներում բարձր մարտական պատրաստակամության իրավիճակ է հայտարարել: Ավելին, Իսրայելի ԱԳՆ մամուլի ծառայությունը հայտարարել է, որ նախարարությունը չի մեկնաբանում արտասահմանում իր ներկայացուցչությունների անվտանգության հետ կապված հարցերը։ Մյուս կողմից Իրանի նախագահը և հարևան երկրի բարձրաստիճան այլ անձինք խոստացել են կոշտ պատասխան տալ Ֆահրիզադեի սպանությանը։
Սա խոսում է տարածաշրջանային նոր լարվածություն սկսելու հնարավոր հեռանկարի մասին, որին դիմակայելու սցենարների մասին հայաստանյան ներքաղաքական դաշտում որևէ դիսկուրս, կարծես, չկա, ինչն անթույլատրելի է, քանի որ այս պայմաններում Հայաստանը կարող է ևս մեկ անգամ հայտնվել պարտադրված պատերազմական իրավիճակում, որին դիմակայելու համար ավելի շատ ռեսուրս կպահանջվի: Եվ այդ պայմաններում հարց է ծագում, թե ընդդիմությունն ինչքանով է կարողանալու դիմակայել երկրորդ ալիքին, որից փախչել չի կարողանալու:
Արմինե Գրիգորյան
