Հրաժարականը ժամանակի հարց է․ կոնսեսուսն առկա է
ՎԵՐԼՈՒԾՈՒԹՅՈՒՆՆԵՐ
Հետևելով ներհայաստանյան զարգացումներին՝ կարող ենք արձանագրել, որ Հայաստանի քաղաքական դաշտում «կոնսենսուս-1» իրավիճակ է ձևավորվել։ Քաղաքական գրեթե բոլոր ուժերը դեմ են Նիկոլ Փաշինյանին ու նրա իշխանությանը, անգամ խորհրդարանական ընդդիմությունը և հատկապես Էդմոն Մարուքյանը։ Օրինակ երեկ թե՛ ԲՀԿ-ն, թե՛ ԼՀԿ-ն մերժեցին Նիկոլ Փաշինյանի հանդիպման առաջարկը, որի ընթացքում քննվելու էր ստեղծված իրավիճակը։ Թե՛ ԲՀԿ-ից, թե՛ ԼՀԿ-ից մեզ փոխանցեցին, որ այս ընթացքում քանիցս հրապարակավ պաշտոնապես դիմել էին Նիկոլ Փաշինյանին՝ առաջարկելով օր առաջ կազմակերպել հանդիպում քաղաքական ուժերի հետ, մասնավորապես ԱԱԽ նիստ կազմակերպել, սակայն հրապարակային կոչերն ու հանդիպման առաջարկն այդպես էլ չէին ընդունվել, իսկ հիմա՝ կապիտուլյացիայի փաստաթուղթը ստորագրելուց հետո, իրենք կարող են Փաշինյանի հետ հանդիպել բացառապես մեկ օրակարգով՝ Փաշինյանի հրաժարականի։
Հավելենք ԼՀԿ-ն ստեղծված իրավիճակից ելքի մասին իր տեսլականը հայտնել է մի քանի օր առաջ, Մարուքյանն ասաց, որ հավատարիմ են այդ տեսլականին, համաձայն որի «պարտության սիմվոլ վարչապետը հեռանում է, խորհրդարանն ընտրում է ժամանակավոր վարչապետ, ձեւավորվում է իրենց ոլորտներում հաջողությունների հասած անձանց անցումային կառավարություն: Հայ-ռուսական հարաբերությունների բարձր որակ է ապահովվում»։ Ըստ էության, Փաշինյանի հրավերին չարձագանքեց նաև ԲՀԿ-ն, ավելին՝ ԲՀԿ խմբակցությունը հայտարարությամբ հանդես եկավ, որում նշված է.
«Նիկոլ Փաշինյանի հետ հանդիպումը կարող է կայանալ միմիայն և բացառապես մեկ օրակարգով՝ իր անցնցում հրաժարականի»»։
Բայց մինչ Նիկոլ Փաշինյանի հրաժարականը խորհրդարանը պետք է չեղարկի ռազմական դրության մասին որոշումը, քանի որ օրենքը թույլ չի տալիս ռազմական դրության պայմաններում վարչապետին անվստահություն հայտնել, ապա ներկայացնի վարչապետի անվստահության նախագիծ։ Սակայն խնդիրն այն է, որ երկու գործընթացների համար ընդդիմությունը բավարար ձայն չունի։ Ռազմական դրությունը չեղարկելու որոշումն ընդունվում է պատգամավորների ընդհանուր թվի ձայների մեծամասնությամբ, այս պարագայում՝ 66 ձայնով, մինչդեռ ԲՀԿ-ն ու ԼՀԿ-ն միասին 41 մանդատ ունեն։ Նույն ընթացակարգով է ընդունվում նաև վարչապետին անվստահություն հայտնելու նախագիծը։ Պատգամավորների 1/3-ը, նախագիծը ներկայացնելիս, նաև վարչապետի իրենց թեկնածուի անունը պետք է ներկայացնի, նախագիծը կարող է հաստատվել կրկին՝ 66 անվանական, ոչ գաղտնի քվեով։ Սակայն քաղաքական հոտառություն ունեցող գործիչները երեկ Փաշինյանի և իմքայլականների հարցուպատասխանից տպավորություն էին ստացել, որ իշխանականներից շատերն առնվազն անհաշտ են կատարվածի հետ եւ եթե ոչ այսօր, վաղը նրանք ևս պահանջելու են Փաշինյանի հրաժարականը։
Անդրանիկ Կիրակոսյան
