Տեղի ունեցածի պատճառով դեռ երկար ժամանակ հասարակության մոտ կոնսենսուս չի կարող լինել. Բորիս Նավասարդյան
ՔԱՂԱՔԱԿԱՆՈՒԹՅՈՒՆ
Առաջին անգամ չէ, որ Հայաստանում ներքաղաքական իրավիճակով պայմանավորված լարվածություն է առաջանում երկրի ներսում: Հայաստանը, ցավոք տեսել է աղետալի հոկտեմբերի 27, մարտի 1: Մեծ ջանքերի շնորհիվ թեև հնարավոր է եղել երկիրը զերծ պահել հնարավոր ցնցումներից, բայց դրանց հետևանքները վերացնելու համար բավական ժամանակ է պահանջվել: Այսօր ևս երկիրը հայտնվել է հերթական ցնցումների մեջ, որը կարող է բավական լուրջ հետևանքների պատճառ դառնալ: Այդ ամենից խուսափելու համար հարկավոր է պահպանել զգոնությունը, հաշվի առնելով այն փաստը, որ հրադադարի պայմանգիրը դեռ պատերազմի ավարտ չէ և ներքին անկայությունը կարող է անդառնալի հետևանքների առջև կանգնեցնել բոլորին:
«Երևանի մամուլի ակումբի» նախագահ Բորիս Նավասարդյանն անդրադառնալով ներքաղաքական իրավիճակի պատճառով երկրում ստեղծված իրավիճակին, 1or.am-ի հետ զրույցում նշեց, որ ցանկացած ներքաղաքական պրոցեսների ժամանակ հարկավոր է պահպանել զգոնություն, որպեսզի քաղաքացիական պատերազմ չհրահրվի:
«Տեղի ունեցածի պատճառով, բնական է, դեռ երկար ժամանակ հասարակության մոտ կոնսենսուս չի կարող լինել: Ուստի, պետք է համախմբման քայլեր իրականացնել: Որպեսզի կարողանանք հաղթահարել այս իրավիճակը, պետք է ամեն ինչ անել, որ ողջ հանրությունը սկսի քայլեր իրականացնել զոհվածների, տեղահանվածների, վիրավորների հարցերը կարգավորելու ուղղությամբ: Միայն այդ դեպքում մենք կկարողանանք խուսափել իրադարձությունները սրելու հեռանկարից: Չի կարելի բռնությունների կոչեր արտահայտող նյութեր հրապարակել: Դա է՛լ ավելի կսրի իրավիճակը, քանի որ կան մարդիկ, որոնք պարտության պատճառով ցասում են ապրում և կարող են այդ հոգեվիճակի պատճառով ընկնել բացասական ալիքի հորձանուտ, որը է՛լ ավելի կսրի իրավիճակը»,- ասաց Բ. Նավասադյանը:
Ավելի վաղ «Երևանի մամուլի ակումբի» նախագահը ֆեյսբուք սոցիալական ցանցի իր միկրոբլոգում կատարել էր գրառում, որում նշում էր, որ իշխանական պատգամավորներն նման իրավիճակում իրավունք չունեն լռելու: Ավելին, պետք է ակտիվ քայլեր իրականացնեն, որպեսզի երկիրը զերծ պահեն անհարկի ցնցումներից:
«Վերջին անգամ եմ դիմում իմքայլական պատգամավորներին: Իրականացրեք ձեր քաղաքաքան առաքելությունը, որպես խորհդարանական հանրապետության օրենսդիր մարմնի մեծամասնություն: Հրապարակայնորեն ներկայացրեք, ինչպիսի ելքեր եք տեսնում և ինչ կոնկրետ քայլեր ձեռնարկում ստեղծված ճգնաժամային իրավիճակում: Եթե դա այսօր էլ չանեք, ուրեմն ինքնակամ հրաժարվում եք ընդհանրապես որևէ քաղաքան գործոն լինելուց, ճանապարհ բացելով հակասահմանադրական զարգացումներին, որի հիմանական պատասխանատուն հենց դուք եք դառնալու»:
Արմինե Գրիգորյան
