Սեփական բացառիկության մտքերով տարված «Իմ քայլը» չի կարողացել իր շուրջը նայել. Վարդան Հարությունյան
ՔԱՂԱՔԱԿԱՆՈՒԹՅՈՒՆ
Իրավապաշտպան Վարդան Հարությունյանը 1or.am-ի հետ զրույցում անդադառնալով նոյեմբերի 9-ին ստորագրած Փաշինյան-Պուտին-Ալիև հայտարարությանը նշեց, որ այն միանշանակ կապիտուլյացիայի մասին է, սակայն, ճիշտ դիվանագիտական քաղաքականություն վարելու դեպքում հնարավոր կլինի ստանալ ավելին, քան այն՝ ինչ նշված է փաստաթղթում: Հարությունյանի կարծիքով՝ թեև նման հնարավորություն կա, սակայն դա չի կարող իրականացնել ո՛չ Նիկոլ Փաշինյանը, ո՛չ էլ նրա քաղաքական թիմը:
«Այդ քաղաքական թիմը ցույց տվեց, որ իրենք նման կարողություններ չունեն: Կարծում եմ, որ եթե իշխող քաղաքական ուժը այս տարիների ընթացքում չդրսևորեր մաքսիմալիստական կեցվածք, ապա մեզ կհաջողվեր շատ հարցերից խուսափել: Սեփական բացառիկության մտքերով տարված «Իմ քայլը» չի կարողացել իր շուրջը նայել: Եթե մի կողմ դնեն իրենց բացառիկության սիդրոմը կկարողանան նաև գիտակցել, որ պետք է մի կողմ դնեն ամեն ինչ և թույլ տան այլ կարող ուժերի անել ամեն ինչ, որպեսզի այս փաստաթղթից հնարավոր լինի քաղել ինչ որ հնարավոր է»,- ասաց Վ. Հարությունյանը:
Նա նշեց, որ վերջին տարիներին Ադրբեջանը բացահայտ սպառնալիքներ էր հնչեցնում, որը, փաստորեն լուրջ չի ընդունվել իշխող կուսակցության կողմից: Մինչդեռ, իրավապաշտպանի կարծիքով՝ պետք է լեգիտիմ ճանապարհով իշխանության եկած ուժերը հասկանային, որ գալիս են ոչ թե իշխանությունը վայելելու, այլ երկրի առջև ծառացած խնդիրները լուծելու համար:
«98 թվականից մինչ օրս չենք ունեցել այս ծանրագույն խնդիրները լուծելուն պատրաստ իշխանություն: Բոլորը այլ խնդիրներով են զբաղված եղել: Ադրբեջանը տարի առ տարի, օր առ օր զգացել է իր առավելությունը Հայաստանի նկատմամբ: Մենք պետք է հաշվի նստենք իրականությունների հետ և հասկանանք, թե որոնք պետք է լինեն հետագա քայլերը: Իմ կարծիքով պատերազմի ժամանակ նախաձեռնությունը Թուրքիայի և Ադրբեջանի ձեռքում էր և նրանք կարողացան թելադրել այն՝ ինչ ուզում էին»,- ասաց Վ. Հարությունյանը:
Արմինե Գրիգորյան
