Ծանոթ ու միաժամանակ անհայտ գրոգ
ՀԱՍԱՐԱԿՈՒԹՅՈՒՆ
Գրոգը իրավամբ համարվում է ամենատարածված խմիչքներից մեկը, որը կարելի է պատվիրել տարբեր քաղաքների և երկրների ցանկացած սրճարանում: Այս համեղ ըմպելիքը բաղկացած է ռոմից, տաք թեյից կամ հյութից և շաքարի օշարակից: Չնայած բաղադրիչների պարզությանը, կան գրոգի շատ տարբեր բաղադրատոմսեր: Ըմպելիքը երկար ճանապարհ է անցել իր ներկայիս ժողովրդականությունը ձեռք բերելու համար: Գրոգի պատմությունը սկսվել է 18-րդ դարի կեսերից շնորհիվ մի անգլիացի ծովակալի: Այդ ըմպելիքը առաջին անգամ հայտնվում է անգլիական նավատորմի նավերում, քանի որ նավաստիները միշտ սիրել են խմել և առավել հաճախ ընտրել են թունդ ռոմը: Այդ ժամանակներում օրապահիկով մեկ անձի համար 240 մլ ռոմը պարտադիր չափաբաժին է եղել: Այնուամենայնիվ, նավի վրա խմելը և, հատկապես նավաստիների արշավները դեպի ափամերձ պանդոկներ, անհանգստացրել է ծովակալ Էդվարդ Վերնոնին: Որպեսզի ալկոհոլի սպառումը նվազեցնի նա հրամայում է նավի վրա եղած ռոմը նոսրացնել սովորական ջրով: Նավաստիներին դա, իհարկե, դուր չի եկել, և նրանք ծովակալին տվել են «Օլդ Գրոգ» մականունը, այն պատճառով, որ Վեռնոնը հաճախ էր կրում անջրանցիկ թիկնոց, իսկ «Grogram cloak»-ը թարգմանաբար նշանակում է հին թիկնոց: Հետագայում այդ անունը կրճատվելով դարձել է գորգ, որից հետո էլ խմիչքին սկսել են այդ կերպ անվանել:
Սկզբում ռոմը նոսրացրել են սովորական եռացող ջրով, իսկ հետո բարելավման համար սկսել ավելացնել հյութեր, համեմունքներ և օշարակներ: Այդ ըմպելիքը նավաստիների օրապահիկում մնացել է մինչեւ 1970 թվականը: Ներկայումս գրոգը հայտնի և սիրված ըմպելիք է ամբողջ աշխարհում: Գրոգի ամենատարածված բաղադրատոմսերից մեկը ներառում է շաքարի օշարակ կամ ջուր, համեմունքներ՝ կոճապղպեղ, մեխակ և դարչին: Այս ամենը պետք է հասցնել եռման, իսկ հետո ավելացնել ալկոհոլը: Գրոգի դասական բաղադրատոմսում օգտագործում է միայն ռոմ, բայց կարելի է այն պատրաստել նաև վիսկիով կամ կոնյակով, և այդ դեպքում այն համտեսելու համար պարտադիր չէ սրճարան գնալ: Եվրոպական երկրներում ցուրտն ընկնելուն պես ընդունված է խմել տաք գինի (որը տարբեր տեղեր տարբեր անվանումներ ունի՝ գլինտվեյն, գլուվայն, գլոգ) և գրոգ: Իսկ Սուրբ ծննդյան տոնավաճառներին այդ երկու խմիչքները պարտադիր են: Գրոգը հատկապես մեծ տարածում ունի ավելի հյուսիսային երկրներում՝ Սկանդինավիայում, Բրիտանիայում, Հոլանդիայում և այլն:
Նյութը հրապարակման պատրաստեց Կամո Խաչիկյանը
