Էրդողանն իր քաղաքական հարցերը իսլամի քողի տակ ներկայացնելով խեղաթյուրում է իսլամը. Արաքս Փաշայան
ՔԱՂԱՔԱԿԱՆՈՒԹՅՈՒՆ
Արաբագետ Արաքս Փաշայանը 1or.am-ի հետ զրույցում նշեց, որ տևական ժամանակ է Թուրքիայի նախագահը իր քաղաքական ամբիցիաները փորձում է ներկայացնել և հիմնավորել իսլամով և, կարծես, Էրդողանը դրանով փորձում է մոտիվացնել իսլամական աշխարհին, որի կարևոր սեգմենտներից է նաև թուրքական աշխարհը:
«Այս առումով կարող ենք ասել, որ Էրդողանը խեղաթյուրում է իսլամը, իր քաղաքական հարցերը ներկայացնելով իսլամի քողի տակ: Արցախյան հակամարտությանը փորձ արվեց կրոնական երանգավորում տալ, ինչը վտանգավոր է, քանի որ, եթե դրան գումարենք հակաքրիստոնեկան հիսթերիան, որը կա նաև Եվրոպայի նկատմամբ, ապա այն կարող է ասոցիացվել մեր խնդիրների հետ, ինչը վտանգավոր է: Արցախյան հարցին կրոնական երանգավորում տալը բարդ իրավիճակ է ստեղծում նաև Մերձավոր Արևելքի հայ համայնքի, ինչպես նաև Հայասնատի համար»,- ասաց Ա. Փաշայանը:
Ըստ արաբագետի, Մերձավոր Արևելքում մենք ունենք թե՛ մարտահրավերներ, թե՛ ռիսկեր և թե՛ վտանգներ: Ուստի, Արցախյան պատերազմին կրոնական երանգավորում տալը հիմք է դառնում թուրքամետ իսլամական հանրույթի համար հայերի վրա հաձակումներ գործելու և հակամարտության իրական բնույթը տեղափոխելու բոլորովին այլ հարթակներ:
«Այս առումով պետք է նշեմ, որ արաբական աշխարհում կան նաև բազմաթիվ երկրներ, որոնք վախեր ունեն Թուրքիայի արտաքին քաղաքականությունից: Էրդողանը վերջին շրջանում արաբական երկրներում ստեղծելով հինգերորդ շարասյուն, ամեն կերպ աջակցում է թյուրքական ծագում ունեցողներին և ամենակոշտ ձևով միջամտում տարբեր երկրների ներքին գործերին, որը կարող է նաև փլուզել այդ երկրների ազգային անվտանգության համակարգերը: Ուստի կարևոր է հաշվի առնել այս ամենը և ավելի խոհեմ և զգուշավոր լինել, որպեսզի Արցախի դեմ մղվող պատերազմին չտրվի կրոնական բնույթ»,- ասաց Ա. Փաշայանը:
Արմինե Գրիգորյան
