Հայկական բանակի պատրաստվածությունը շատ բարձր է. Արկադի Տեր-Թադևոսյան
ՀԱՍԱՐԱԿՈՒԹՅՈՒՆ
Արցախի հերոս, գեներալ-մայոր Արկադի Տեր-Թադևոսյանը համոզված է, որ մեր բոլոր քայլերը պետք է համապատասխանեն զինվորական բոլոր օրենքներին և պետք է թշնամուն այնքան վնաս պատճառենք, որ հասնենք գերակայության նրանց նկատմամբ:
«Մեր հաջողությունները հասարակության համար տեսանելի չեն, քանի որ ադրբեջանական ուժերի կողմից ձևավորված մի քանի տարբեր խմբերի դեմ ենք պայքարում: Մի կողմից ադրբեջանական զինվորներն են, մյուս կողմից թուրքական ուժերը, երրորդ կողմից ահաբեկչական խմբավորումները: Մեր զինվորները հաջողությամբ կռվում են այդ երեք ուղղություններով և հիմա արդեն նախապատրաստվում ենք այլ գործողություններ ևս ձեռնարկել»,- 1or.am-ի հետ զրույցում ասաց Ա. Տեր-Թադևոսյանը:
Վեջին տվյալներով՝ հայկական ուժերին հաջողվել է թշնամու բավական մեծ մարդկային ուժ և զրահատեխնիկա ոչնչացնել: Փորձառու զինվորականի դիտարկմամբ՝ Հայաստանի դեմ բավականին փորձառում զինվորականներ են կռվում: Մանսավորապես՝ Թուրքիայի հատուկ նշանակության ջոկատները, որոնք վերջին շրջանում կռվել են Սիրիայում:
«Մենք պետք է իրավիճակը ճիշտ գնահատենք: Ադրբեջանը բավականին պատրաստվել է այս պատերազմին, բայց պետք է հաշվի առնել, որ հայկական բանակի պատրաստվածությունը ևս շատ բարձր է, որը երևում է միջդիրքային մարտերի ժամանակ: Բացի այդ, մեր զինվորները հայրենասեր ու խիզախ են, գիտեն ինչի համար են կռվում, այդ պատճառով էլ կարողանում ենք մեր նպատակին հասնել: Հակառակորդը ջարդելով, փշրելով է կռվում, ինչը նենգություն է: Երբ խաղաղություն հաստատվի, ես կարծում եմ, որ պետք է խոնահրվենք մեր բոլոր զինվորների առջև և նրանց արժանին մատուցենք, նրանց գործած բոլոր սխրանքների համար»,- ասաց Ա. Տեր-Թադևոսյանը:
Արմինե Գրիգորյան
