«Կրթություն հանուն հաղթանակի» գաղափարը համախմբել է կամավորներին ու Արցախից եկած երեխաներին․«Փաստ»
ՄԱՄՈՒԼԻ ՏԵՍՈՒԹՅՈՒՆ
«Փաստ» օրաթերթը գրում է
Արցախից եկած երեխաների համար կրթության, ինչպես նաև ժամանցի հնարավորություններ է ստեղծել «Կրթություն հանուն հաղթանակի» նախաձեռնությունը: Պատերազմի այս օրերին առաջացած գաղափարը, որը սկզբում ընդամենը ֆեյսբուքյան գրառում էր, այսօր արդեն միավորել է բազմաթիվ կամավորների: Նախաձեռնության անդամ Աշոտ Պետրոսյանը, որը կրթության ոլորտի ներկայացուցիչ է, դասավանդման փորձ ունի, «Փաստի» հետ զրույցում ընդգծեց. «Կար մտահղացում այստեղ գտնվելու ժամանակ ապահովել Արցախից եկած երեխաների ժամանցը, ինչպես նաև երեխաներին տալ ինչ-որ գիտելիքներ, որոնք հետագայում իրենց պետք կգան:
Այսինքն, օգտակար դարձնել առօրյան և երեխաներին փոխանցել հմտություններ և գիտելիքներ: Մեր նախաձեռնությունը բացառապես ֆիզիկական անձանց գաղափարի արդյունք է: Մի քանի անձի գաղափարին հետո արդեն միացել են կամավորներ, որոնք ավելի շատ կազմակերպչական հարցերով են զբաղվում»: Նրա խոսքով, դեռ սկզբնական փուլում տարբեր կամավորներից ստացել են արձագանքներ թե՛ նկարչության, թե՛ լեզուների, թե՛ անգամ նաև ծրագրավորման դասընթացներ իրականացնելու պատրաստակամության մասին:
«Հետո մի քանի ընկերներով ավելի մեծ ծրագրերի շուրջ քննարկեցինք, ու ավելի առարկայական կետեր ներկայացվեցին: Հիմա արդեն շատերն են միացել նախաձեռնությանը: Ընդ որում՝ նրանք տարբեր կերպ են փորձում օգտակար լինել: Մեկն ասում է՝ ունեմ այս գիտելիքը, պատրաստ եմ ամեն կերպ աջակցել, մեկը պատրաստի ծրագիր է ներկայացնում՝ շեշտելով, որ շաբաթական մի քանի օր կոնկրետ ժամերի պատրաստ է հստակ տարիքային երեխաների հետ առարկաներ պարապել: Արձագանքները շատ էին, միանգամից եղան նաև տարածքներ տրամադրելու առաջարկներ: Ի սկզբանե մենք ուզում էինք դասընթացները կենտրոնացված ինչ-որ վայրերում կազմակերպել, «Կրթություն հանուն հաղթանակի» ֆեյսբուքյան էջում տարածվում էր նաև ժամատախտակ:
Բայց քանի որ ԿԳՄՍ նախարարությունը կորոնավիրուսի թվերի ավելացման պատճառով դպրոցները փակելու որոշում կայացրեց, որոշեցինք այս պահին կենտրոնացված դասերը դադարեցնել: Հիմա դասերը կազմակերպվում են այն վայրերում, որտեղ երեխաները բնակվում են: Մենք ինքներս ենք գնում բնակության վայրեր»,-ասաց մեր զրուցակիցը: Նա հայտնեց, որ համագործակցության առաջարկներ են ստացել նաև թանգարաններից, ինչպես նաև մարզասրահներից: «Այցեր են կազմակերպվում նաև թանգարաններ, ֆիթնես սրահներ, սպորտային միջոցառումներ են կազմակերպվում, ինչպես, օրինակ, ֆուտբոլն է: Այս ամենի մեջ նաև հոգեբանական բաղադրիչ կա:
Օրինակ՝ նախօրեին երեխաներն այցելել են Ալեքսանդր Սպենդիարյանի տուն-թանգարան, որտեղ շրջայցից հետո երեխաների համար նաև կիրառական արվեստի դաս է կազմակերպվել: Ափսեների վրա նկարել էին ու երեխաները միաձայն որոշել էին դրանք վաճառքի հանել, թողնել թանգարանում, որպեսզի վաճառքից գոյացած գումարը փոխանցվի «Հայաստան համահայկական հիմնադրամին»,-նշեց Ա. Պետրոսյանը: Նրա փոխանցմամբ, նախաձեռնության շուրջ հետաքրքրությունը օր օրի մեծանում է: «Ավելանում են նաև այն վայրերը, որտեղ մենք այցելելու ենք:
Հետաքրքրությունն ավելանում է, ու եթե սկզբում նախաձեռնության մեջ հիմնականում կարևորել էինք կրթական բաղադրիչը, ինչպես հասկացաք, այսօր արդեն կա նաև ժամանցայինը: Առաջիկա օրերին նախատեսված են այցելություններ տարբեր թանգարաններ, նաև վայրեր, որոնք Երևանից դուրս են: Կարելի է ասել, որ արդեն այսօր թե՛ մեր շրջանակը, թե՛ նաև երեխաների ներգրավվածությունն է մեծանում: Եթե կլինեն կենտրոններ, որտեղ երեխաները բնակվում են, ու կլինի այդ կենտրոններում որևէ դասընթաց կազմակերպելու ցանկություն, թող դիմեն, ու շատ արագ կկազմակերպենք այն:
Այս պահին մենք շատ մեծ թվով կամավորներ ունենք, որոնք ներկայացրել են, թե ինչ են պատրաստ անել: Օրինակ՝ ոչ միայն ռուսերեն, անգլերեն, այլև ֆրանսերեն, իտալերեն, գերմաներեն, իսպաներեն դասավանդելու առաջարկներ են եղել: Եթե ինչ-որ տեղ ֆրանսերենի դասընթացի կարիք լինի, մենք կկազմակերպենք: Բացի այդ, հոգեբանական խաղեր կարող ենք կազմակերպել: Ուզում եմ հայտնել, որ մեզ շատ են արձագանքել նաև պրոֆեսիոնալ նկարչական արվեստանոցներից, մենթալ թվաբանության կենտրոններից, երեխաների զարգացման կենտրոններից ու հայտնել, որ բաց են երեխաներին ընդունելու առումով»,-ընդգծեց նախաձեռնության անդամը՝ շեշտելով, որ կրթությունը, մեծ հաշվով, ազգային անվտանգության կարևորագույն բաղադրիչներից մեկն է։
Մանրամասները՝ «Փաստ» օրաթերթի այսօրվա համարում
