Չեմ կարծում՝ մեղավորներ կան. Գալուստ Սահակյանը՝ ապրիլյան պատերազմի կորուստների մասին
ՎԵՐԼՈՒԾՈՒԹՅՈՒՆՆԵՐ
Անցանք չորսօրյա պատերազմի միջով, ունեցանք կորուստներ՝ թե′ մարդկային, թե′ նյութական, թե′ տարածքային: Ազգային ժողովը, սակայն, այդպես էլ քննության առարկա չդարձրեց՝ ով էր մեղավոր, որ ունեցանք այդպիսի կորուստներ: Այդ մասին Ազգային ժողովում դիմելով Ազգային ժողովի նախագահ Գալուստ Սահակյանին՝ ասաց ԱԺ «Ժառանգություն» խմբակցության ղեկավար Զարուհի Փոստանջյանը:
«Ժամանակն է, որ Ազգային ժողովը հանձնաժողովների միջոցով քննության առարկա դարձնի կորուստների վերաբերյալ իրողությունը, և մենք կարողանանք հնարավորություն ունենալ պատասխանատվության կանչել մեղավորներին: Առաջին անգամ 25 տարվա մեջ մենք ունեցանք տարածքային կորոստներ: Դրանց վերաբերյալ քննարկում, կորուստները վերականգնելու լուծում չունենք և չունենք նաև լուծումներ համապատասխան պաշտոնյաների կողմից»,- ասաց պատգամավորը:
Զարուհի Փոստանջյանը հիշեցրեց, որ պաշտոնյաներից մեկը հայտարարել էր՝ եթե ցանկություն կա, թող գնան ազատագրեն այդ տարածքները:
«Մեր հերոսները ցանկություն հայտնեցին, սակայն հերոսներին հիմա կալանավորել են, և նրանք գտնվում են բանտախցում: Սա էլ պետք է քննարկման առարկա լինի, որ մեր հերոսները, ովքեր հանիրավի գտնվում են բանտախցում, ազատ արձակվեն: Նրանք էին, որ հայտարարեցին՝ այո, կգնանք, կազատագրենք: Հազար հոգի հայտարարել էր, որ կգնա, կազատագրի: Մինչդեռ, հերոսներին բանտարկել են, և այս պահին մենք ունենք տարածքներ, որոնք գտնվում են օկուպացիայի մեջ, տարածքների վերականգման խնդիր ունենք: Այդ իսկ պատճառով հորոդրում եմ Ձեզ՝ հատուկ նիստի միջոցով կամ հանձնաժողովների կողմից քննարկման առարկա դարձնել այս խնդիրը»,- Գալուստ Սահակյանին ասաց Զարուհի Փոստանջյանը:
ԱԺ նախագահն իր հերթին ասաց, որ ինքը «կարծում է՝ այդ խնդիրը քննարկվել է մեր հանձնաժողովներում»:
«Պաշտպանության նախարարությունն այդ մասին ուղերձ է հղել, բազմաթիվ քննարկումներ են եղել: Ես ինքս անձամբ այնպես չեմ մոտենում խնդրին, որ այստեղ ինչ-որ քննարկելու հարց կա և մեղավորներ կան և եթե Դուք գտնում եք, որ նպատակահարմար է, դիմեք համապատասխան հանձնաժողովին, թող այդ հարցը քննարկի»,- պատասխանեց Սահակյանը:
