Ցանկացած անշգույշ արտահայտություն կամ բառ ռումբի նման կարող է վնասել մեզ. Իրինա Ծատուրյան
ՔԱՂԱՔԱԿԱՆՈՒԹՅՈՒՆ
Արցախա-ադրբեջանական պատերազմական գործողություններին զուգահեռ ընթանում է ոչ միայն տեղեկատվական, այլև՝ նյարդերի պատերազմ, որին դիմակայելու համար ևս բավական նյարդեր ու գիտելիք է հարկավոր: Ուշագրավ է, որ կարող են լինել դեպքեր, երբ սոցիալական ցանցերում զգացական ցանկացած խոսք, միտք կամ բարի լուր ավետող գրառում հակառակ ռեակցիա առաջացնի և օգուտ տալու փոխարեն ավելի շատ վնասի մեր համընդհանուր համախմբանն ու պայքարին:
Հոգեբան Իրինա Ծառուրյանը 1or.am-ի հետ զրույցում, անդրադառնալով հասարակության ներկա հոգեբանական վիճակին, նշեց, որ հայ ազգը երկար ժամանակ, գտնվելով Թուրքիայի կողմից իրականացված Ցեղասպանության ենթարկված լինելու հոգեբանական ճնշման ներքո, որին գումարվել են նաև հայ-ադրբեջանական պատերազմական երկարատև պայքարն ու վերջին շրջանում COVID-19-ով պայմանավորված նյարդային լարված իրավիճակը, հասարակության մոտ գերլարված նյարդային իրավիճակ է առաջացրել: Բայց, այդ ամենով հանդերձ, հիմա հասրակությունը պետք է կարողանա իր զգոնությունը չկորցնել, քանի որ հակառակ դեպքում կարող է վնասել թե՛ իրեն, և թե՛ հասարակությանը:
«Հիմա, բոլորս պետք է զսպվածություն ցուցաբերենք և որևէ մեկնաբանություն, հատկապես՝ բացասական առումով՝ չանենք, քանի որ դրանով մի կողմից վնասում ենք ոչ միայն ինքներս մեզ, այլև մնացածին: Պետք է աշխատել չխոսել բացասական երևույթների մասին, և եթե չենք կարողանում դրական միտք արտահայտել, ապա պետք է ոչ միայն ֆեյսբուքյան տարածքում, այլև սովորական շփումների ժամանակ պարզապես լռենք»,- ասաց Ի. Ծատուրյանը:
Խոսելով ֆեյսբուք սոցիալական ցանցի առանձնահատկության մասին՝ հոգեբանը շեշտեց, որ այն լինելով ներանձնային իրավիճակները հանրայնացնելու հարթակ, ներկայի ֆորսմաժորային իրավիճակում չի կարող շարունակել մնալ էմոցիաները արտահայտելու հարթակ:
«Յուրաքանչյուրը տանը նստած, բան ու գործ չունենալով, սկսում է մտքեր արտահայտել: Մինչդեռ կարող էր իր ուժերը ներդնել կամավորության սկզվունքով օգտակար լինելու և տարբեր տեղերում իր օգնությունն առաջարկելու հարցում: Այս ընթացքում ցանկացած անշգույշ արտահայտություն կամ բառ նման է ռումբի, որով վնասում ենք ինքներս մեզ: Պետք չէ թաքնվել ֆեյսբուքի հետևում և անհարգալից վերաբերմունք դրսևորել միմյանց հանդեպ: Ցավալին այն, է, որ եթե հայտարարվի, որ հարկավոր է գնալ հոսպիտալ և օգնություն ցուցաբերել բուժանձնակազմին, հավատացած եմ, որ շատերը չեն գնա: Չ՛ի կարելի ռազմի դաշտում կռվողի թիկունքում զազրախոսությամբ զբաղվել: Պետք է նաև հաշվի առնել, որ այս ամենը ինքնամաքրման հնարավորություն է և պետք է նախկինի ատելությունները մի կողմ դնենք, պետք է ոչ թե խոսենք, այլ գործ անենք: Հակառակ դեպքում էմոցիոնալ պատերազմը կարող է դառնալ հիվանդության պատճառ: Ներանձնային ատելությունը, վախը, անորոշությունը, սպասումները միախառնվելով՝ բավական լարված հոգեբանական ազդեցություն են ունենում հասարակության վրա, բայց պետք է հաշվի առնենք, որ դեռ որևէ մեկը չգիտի, թե այս ամենը ինչքան կտևի, ուստի պետք է մեր ուժերը խնայենք: Եվ, եթե խաղաղություն չկարողանանք ունենալ մեր մտքում, խաղաղություն չի լինի որևէ այլ վայրում: Այս առումով ես խոնարհվում եմ Արծրուն Հովհաննիսյանի առջև նման գրագետ աշխատանքի համար և առաջարկում եմ հետևել նրա օրինակին»,- ասաց Ի. Ծատուրյանը:
Արմինե Գրիգորյան
