Նախագահների «ընդհատակյա դիվանագիտությունը»
ՎԵՐԼՈՒԾՈՒԹՅՈՒՆՆԵՐ
Օրերս հայաստանյան մամուլում տեղեկություն տարածվեց, որ ՀՀ երկրորդ նախագահ Ռոբերտ Քոչարյանն Արցախից վերադարձել է Երևան հանդիպել ՀՀ–ում ՌԴ դեսպան Սերգեյ Կոպիրկինի հետ։ Թե ինչ արդյունք կունենա տվյալ հանդիպումը, ցույց կտա ժամանակը: Միաժամանակ տեղեկատվության տողատակում մի փոքր հավելում կա, ինչից պարզ է դառնում, որ Քոչարյանից առաջ Կոպիրկինի հետ հանդիպել էր նաև երրորդ նախագահ Սերժ Սարգսյանը: Ըստ էության տվյալ տեղեկատվությունից հայտնի է դառնում, որ դեռևս օրեր առաջ Սերժ Սարգսյանն արդեն հանդիպել էր ՌԴ դեսպանին և իր մտահոգություններն ու մոտեցումները ներկայացրել Արցախում ծավալված պատերազմի վերաբերյալ։
Հատկանշական է, որ բոլորից վաղ արցախյան հարցի շուրջ հենց Սարգսյանն ինքն է նախաձեռնել դեսպան Կոպիրկինի հետ հանդիպում և հստակ ներկայացրել բուն իրավիճակը։ Այստեղ հետաքրքրականն այն է, որ այդ հանդիպման մասին նախագահ Սարգսյանի գրասենյակը նախըտրել է լռել և չհրապարակել՝ փորձելով ավելի լուրջ լինել և որոշ շրջանակաների նման անհարկի չփիառվել, ինչպես ընդունված է վերջին շրջանում։ Այսինքն ստացվում է այնպես, որ չնայած գոյություն ունեցող տարբեր քննադատություններին և անընդհատ սերմանվող ատելությանը մեր երկու նախագահներն էլ փորձում են ստեղծված իրավիճակից դուրս գալու ելքեր փնտրել։
Բոլորս ենք տեսնում, թե ինչպես են ներկա փուլում ևս, չնայած այն հանգամանքին, որ ներքաղաքական կոնսոլիդացիայի և համերաշխության մասին հայտարարվել է քանիցս, սկսվել է երկու նախագահների համացանցային հերթական թիրախավորումը․ դարձյալ տարբեր հայտնի շրջանակներից բուծվող ֆեյքեր և գրչակներ փորձում են աղբ լցնել նրանց վաստակի վրա։ Այնունհանդերձ նրանք փորձում են ստեղծված իրավիճակում «ընդհատակյա» դիվանագիտություն օգտագործել՝ ի շահ պետության։ Եվ ամենակարևորը՝ դա անում են առաց ավելորդ պաթոսի և հրապարակավ փիառվելու։
Անդրանիկ Կիրակոսյան
