Ադրբեջանին սթափեցնող կոչեր մի՛ արեք, այլ՝ գործեք, նրանք միայն այդ դեպքում կսթափվեն. Գրիգորի Այվազյան
ՔԱՂԱՔԱԿԱՆՈՒԹՅՈՒՆ
Պատմական գիտությունների թեկնածու ադրբեջանագետ Գրիգորի Այվազյանը 1or.am-ի հետ զրույցում նշեց, որ Ալիևը շատ է սիրում նմանվել Հրտլերին և Գեբելսի օրինակով կառուցելով ստի մեքենա, այսօր իր ժողովրդին սուտ տեղեկատվությամբ է կերակրում:
«Փաստացի ադրբեջանական հասարակությունը գնտվում է տեղեկատվական բլոկադայի մեջ և չի գիտակցում, թե իրականում ինչ է կատարվում: Ալիևը պարտավոր է ստեր տարածել, որպեսզի ժողովրդի ցասումը իր դեմ չուղղվի: Առհասարակ, ինչի՞ մասին է խոսում Ալիևը: Մակրոնի հայտարարությունից հետո ուրիշի միջոցով փորձում է հայտարարություն տարածել, թե Ֆրանսիան պետք է դուրս գա ԵԱՀՄ Մինսկի խմբի համանախագահությունից: Վաղը նույն բանը ինքը կհայտարարի: Սրանով, պարզապես, Ալիևը հող է նախապատրաստում իր հայտարարության համար: Պատահական չէր նաև CNN-ի օրեր շարունակ պատերազմի մասին լռությունը: Այստեղ ևս նավթադոլարների ականջներն են երևում, որը պետք է ժամանակին հասկանալ և ճիշտ հակահարված տալ»,- ասաց Գ. Այվազյանը:
Գերտերությունները խոսում են իրենց շահերը հաշվի առնելով: Մենք էլ պետք է մեր կողմից ամեն ինչ անենք մի կողմից ալիևյան ստերը չեզոքացնելու, մյուս կողմից աշխարհին իրականությունը բացատրելու համար:
«Ադրբեջանը լայնածավալ կեղծ քարոզչություն է իրականացնում, որ ադրբեջանական բնակավայրերը գնդակոծվում են Հայաստանից: Դրանով նա հող են նախապատրաստում պատերազմական գործողությունները Հայաստան տեղափոխելու մասին: Ալիևյան ֆեյք նյուզի դիմաց մենք պետք է Ադրբեջանի բազմազգ ժողովրդին տեսանելի դարձնենք իրականությունը և այն հասցնենք Ադրբեջանում ապրող ցանացած մարդու տուն և ընտանիք: Եվ, եթե մենք նույնիսկ մեկ սանտիմետր զիջման գնանք, Ադրբեջանը կսկսի ավելի ագրեսիվ իրեն պահել: Արցախն իրավունք ունի ինքնապաշտպանվելու և պատերազմական իրավիճակում կարող է հարվածել Ադրբեջանի ամենացավոտ կետերին: Պետք է հաշվի առնել նաև, որ թեև ադրբեջանական սուտ քարոզչությանը, միևնույն է, միջազգային հանրության համակրանքը մեր կողմն է: Հարկավոր է օգտվել այս առիթից և օր առաջ ավելի ընդլայնել մեր քարոզչությունը: Հայե՛ր Ադրբեջանին սթափեցնող կոչեր մի արեք, այլ՝ գործեք: Նրանք միայն այդ դեպքում կսթափվեն»,- ասաց Գ. Այվազյանը:
Արմինե Գրիգորյան
