Ինչից է վախեցել Սամվել Ալեքսանյանը
ԱՄԵՆԱԸՆԹԵՐՑՎԱԾ
Գրեթե բոլորն էին նկատել ու զարմացել, որ ՀՀԿ խմբակցության պատգամավոր Սամվել Ալեքսանյանը կյանքում երեւի առաջին անգամ առավոտից երեկո մնացել էր Ազգային ժողովում:
Սովորաբար, նա ու իր կալիբրի պատգամավորները ԱԺ նիստերին ներկայանում են հաշվված րոպեներով, նիստը սկսվելիս մտնում գրանցվում են, քվեարկում ու արագ ծլկում ԱԺ շենքից:
Խորհրդարանում մնալու առիթը Կառավարության նոր ծրագիրն էր: Նոր կառավարություն, նոր վարչապետ, նոր ծրագիր ու ըստ երեւույթին նոր Սամվել Ալեքսանյան: Բայց քննարկման ընթացքը լույս սփռեց, թե ինչու է Կարեն Կարապետյանն արժանացել Ալեքսանյանի <<հարգանքին>>:
Ծրագրի քննարկման ընթացքում պատգամավորներից շատերը հետաքրքրվեցին Հայաստանում հաստատված մոնոպոլիաներից ու նրանց դեմ Կարապետյանի ձեռնարկելիք քայլերի ու գործողությունների մասին հարցրեցին՝ համարելով, որ տնտեսության գլխավոր խոցերից մեկը մոնոպոլիաներն են: Նիկոլ Փաշինյանը անվանական հարց հնչեցրեց, հիշատակեց նաեւ Ալեքսանյանի անունը: Նիկոլ Փաշինյանը հարցրեց, թե ո՞նց է կառավարությունը պատրաստվում պայքարել Սամվել Ալեքսանյանի դեմ, ով շաքարավազի շուկայում ունի մենաշնորհ, ինչպես նաեւ Միհրան Պողոսյանի դեմ, ով բանանի շուկայում է ստեղծել մենաշնորհ:
«Ո՞նց եմ պայքարելու Սամվել Ալեքսանյանի, Միհրան Պողոսյանի և այլոց մոնոպոլիաների դեմ, շատ պարզ՝ խաղի կանոնները լինելու են բոլորի համար նույն ձևի: Ո՞նց են իրենց մոնոպոլիաներն առաջացել՝ գուցե ձևակերպումս մի քիչ կոռեկտ չէ, հետաքրքիր չէ ինձ: Բայց լինելու է բաց դաշտ, թե ով այդ ոլորտում կլինի ավելի հաջողակ, ժամանակը ցույց կտա»,- ասաց վարչապետը: Նիկոլ Փաշինյանը ճշտեց՝ Կարեն Կարապետյանն ակնարկում է, որ Սերժ Սարգսյանի ու Հովիկ Աբրահամյանի իշխանության տարիներին այդ դաշտը փա՞կ է եղել՝ մասնավորապես շաքարավազի ու բանանի մասին է խոսքը:
«Նախկինում ադմինիստրատիվ միջամտություն եղե՞լ է, չեմ բացառում, որ եղել է»,- բազմանշանակ պատասախանեց վարչապետը՝ գուցեեւ ակնարկելով, որ ինքը չի պատրաստվում դաշտը «փակել» Սամվել Ալեքսանյանի համար, եթե ոչ անել հակառակը՝ բացել այն ուրիշնեի առջեւ:
Մենք ավելի վաղ տեղեկացրել ենք, որ վարչապետ նշանակվելու առաջին իսկ օրերին Կարապետյանը առանձին-առանձին հանդիպել է խոշոր գործարարներին, նրանց թվում՝ Սամվել Աեքսանյանին: Գուցե Կարապետյանը արդեն զգուշացրել է իր մտադրությունների մասին ու դրանով է պայմանավորված Ալեքսանյանի «հարգանքը», իսկ որ ավելի ճիշտն է՝ վախերն առ Կարեն Կարապետյան: Հատկապես որ վերջին օրերին մեր համաքաղաքացիներից շատերն են խոսում, որ Ալեքսանյանին պատկանող Սիթիներում ապրանքների գներն էական աճ են ունեցել: Արտոնյալ գործարարին երեւի թե կամաց-կամաց ներքաշում են հարկային դաշտ, նա էլ գլխի ճարը տեսնում է:
Անի Սահակյան
