Մոտակա տասնամյակը շատ բարդ է լինելու ժողովրդագրական տեսանկյունից.Արտակ Մարկոսյան

ՀՀ վարչապետ Նիկոլ Փաշինյանը վերջերս ներկայացրեց Հայաստանի վերափոխման ռազմավարությունը, որով ծրագրվում է Հայաստանի բնակչության թիվը 2050-ին հասցնել 5 մլն-ի։  

Այդ թեմայով 1or.am  կայքը զրուցել է ժողովրդագիր Արտակ Մարկոսյանի հետ, պարզելու համար, թե որքանո"վ է իրատեսական այդ ծրագիրը։ Հարցին, թե` որպես մասնագետ ի"նչ կարծիք կա, արդյոք ապագա ունի այս ծրագիրը, ժողովրդագիրը պատասխանեց․

«Եթե խոսում ենք 30 տարվա կտրվածքով՝ հնարավոր է, կարող է լինել։ Բայց իրատեսական է, եթե խոսում ենք 30 տարվա կտրվածքով և այնպիսի պետության մասին, որտեղ լինելու է տնտեսական աճ, պետական կառավարման նորմալ համակարգ, նորմալ դատական համակարգ: Եվ եթե լինեն այս գործոնները ապա 30 տարվա մեջ հնարավոր է նման ցուցանիշ։ 

Այս պահին դեռ ոչ, հատկապես, եթե նայենք 10 տարվա կտրվածքով  ժողովրդագրական առումով մեզ շատ ծանր գործընթացներ են սպասվում։ Բայց 30 տարվա մեջ հնարավոր է ունենանք, եթե հստակ ու ճիշտ  քաղաքականություն լինի։ Բայց պետք է հասկանանք, որ աշխարհը շատ արագ է փոխվում, և, նախ՝ պետք է մտածենք միջնաժամկետ՝ 2030 թվականի մասին։ Ինչ խոսք, մոտակա տասնամյակը շատ բարդ է լինելու ժողովրդագրական տեսանկյունից, քանի որ մեզ 2025 թ-ից հետո  սպասվում է դեպոպուլացիա, այսինքն՝ մահերը կարող են գերազանցել ծնունդներին։

Այնպես որ, մենք կոնկրետ այս պահին անելիք ունենք, որ դա թույլ չտանք։ Այո, նախորդ տարի բավականին քայլեր են կատարվել, մասնավորապես երեխաների խնամքի նպաստի գումարն է բարձրացվել,  առաջին և երկրորդ երեխայի համար միանվագ դրամական  նպաստն է բարձրացել, երեխաներին տրամադրվող նպաստն է բարձրացել, գյուղական համայնքներում բնակվող նաև չաշխատող ծնողին տրամադրվող նպաստ է նշանակվել, բայց դա դեռևս բավարար չէ, որովհետև մեզ հստակ ծրագրեր են պետք երրորդ և չորրորդ երեխաների ծնունդը խթանելու համար:

Այլապես, մենք կարող ենք ծնելիության ցուցանիշի ավելի ծանր անկում ունենալ, քան կարող ենք կանխատեսել»։

Սոնա Գիշյան