Ինչ է լեյկոզը և որոնք են այս հիվանդության մասին հուշող հիմնական ախտանշանները

Լեյկոզը (լեյկեմիա, արյան քաղցկեղ), ինչպես և քաղցկեղի ցանկացած այլ տեսակ, շատ վտանգավոր հիվանդություն է, որը տարեկան հազարավոր մարդկանց մահվան պատճառ է դառնում։ Այս ախտաբանության զարգացման հիմնական պատճառը ոսկրածուծում արյան բջիջների ստեղծման գործընթացի խանգարումն է լինում։ Այս հիվանդության բարեհաջող բուժումը կախված է վաղ ախտորոշումից, սակայն խնդիրն այն է, որ շատ հաճախ մարդիկ չեն նկատում քաղցկեղի մասին հուշող ախտանշանները, ինչի հետևանքով այն հայտնաբերվում է չափազանց ուշ և բուժումը բավական արդյունավետ չի լինում։

Ինչպես գրում է Express պարբերականը, բրիտանական Leukemia Care բարեգործական կազմակերպության մասնագետները նշել են օրանիզմում տեղի ունեցող այն փոփոխությունները, որոնք կհուշեն լեյկոզի՝ արյան քաղցկեղի զարգացման մասին՝ օգնելով ժամանակին նկատել վտանգավոր խնդիրն ու միջոցներ ձեռնարկել դրա դեմ պայքարի համար։ 

Մասնագետների խոսքով՝ արյունաստեղծ հյուսվածքներում չարորակ ուռուցքների առաջացման մասին հուշող ախտանշանները սովորաբար պայմանավորված են լինում արյան նորմալ բջիջների բացակայությամբ։ Այս վտանգավոր հիվանդության մասին նախազգուշացնող ախտանշաններից մեկն է մաշկային որոշակի խնդիրների զարգացումը։

«Երբ ոսկրածուծը լցվում է լեյկոզային բջիջներով, այն կորցնում է մեծ քանակությամբ արյան առողջ բջիջներ արտադրելու ունակությունը, մինչդեռ օրգանիզմն ունի դրանց կարիքը։ Սա կարող է հանգեցնել պուրպուրայի առաջացման, որի դեպքում մարմնին խիտ և մանր մուգ կարմիր բծեր են առաջանում։ Բացի այդ, կարող են նաև առանց որևէ պատճառի ի հայտ գալ կապտուկներ, արյունազեղումներ կամ ցան», - նշում են մասնագետները։

Մաշկային դրսևորումներից բացի լեյկոզը կարող է նաև այլ ախտանշաններ ունենալ։ Օրինակ՝ այս հիվանդության մասին կարող են նախազգուշացնել քթային արյունահոսություններն ու հաճախակի արյունահոսող լնդերը, ինչը պայմանավորված է լինում հիվանդության զարգացման ֆոնին թրոմբոցիտների արտադրության գործընթացի փոփոխություններով։

Բժիշկների խոսքով՝ օրգանիզմում էրիթրոցիտների պակասի պատճառով այս հիվանդությանը կարող են դրսևորվել նաև անեմիային (սակավարյունություն) բնորոշ որոշ ախտանշաններով, որոնց շարքին են դասվում գունատությունը, հոգնածության զգացումը, հևոցն ու գլխապտույտը։

Այս վտանգավոր հիվանդության ախտանշանները չեն սահմանափակվում նշվածներով, ուստի հարկավոր է շատ զգոն լինել և չանտեսել նաև հիվանդության մյուս ախտանշանները։ Ոչ մի դեպքում չի կարելի անուշադրության մատնել այնպիսի խնդիրները, ինչպիսին են․

• բարձր ջերմությունը,
• գիշերային առատ քրտնարտադրությունը,
• քաշի անբացատրելի կորուստը,
• ավշային հանգույցների այտուցվածությունը,
• որովայնի վերին ձախ կողմում պնդացած հատվածի առկայությունը, ինչը պայմանավորված է լինում փայծաղի մեծացմամբ,
• ոսկրային հյուսվածքների ցավերն ու հոդացավերը,
• տեսողական խանգարումները,
• գլխացավերը։

Այս ախտանշանները ոչ միշտ են պայմանավորված լինում քաղցկեղով, ուստի դրանց առկայության դեպքում պետք չէ խուճապի մատնվել։ Նման խնդիրների դեպքում հարկավոր է անհապաղ դիմել մասնագետին ու բուժզննում անցնել հիվանդության առկայությունը հերքելու կամ հաստատելու համար։ Սա կօգնի անհրաժեշտության դեպքում ժամանակին միջոցներ ձեռնարկել ու կբարձրացնի բարեհաջող բուժման հավանականությունը։

Հարկ է հիշել, որ ցանկացած հիվանդություն վաղ փուլերում բուժելը շատ ավելի հեշտ է, քան հետագայում նաև դրա հետևանքով առաջացած բարդությունների դեմ պայքարելը։ Սա է պատճառը, որ մասնագետները հորդորում են պարբերաբար բուժզննում անցնել, զգոն լինել և չանտեսել օրգանիզմի տված հուշումները, ինչպես նաև ժամանակին դիմել բժշկին այս կամ այն ախտանշանի առկայության դեպքում։