Սուրեն Սարգսյանը ԱՄՆ նախագահ Դոնալդ Թրամփի ուղերձում որևէ մեսիջ չի տեսնում
ՔԱՂԱՔԱԿԱՆՈՒԹՅՈՒՆ
ՀՀ անկախության 29-րդ տարեդարձի առթիվ վարչապետ Նիկոլ Փաշինյանին ուղղված շնորհավորական ուղերձում ԱՄՆ նախագահ Դոնալդ Թրամփը նշել է, որ այսօրվա մարտահրավերները մեկ անգամ ևս վերահաստատում են երկու երկրների գործընկերության կարևորությունը:
Ըստ նրա` հայ և ամերիկացի ժողովուրդների միջև կապերն անհերքելիորեն ամուր են ու տևական՝ լինի միասնաբար նոր կորոնավիրուսի գլոբալ համավարակին դիմակայելիս, թե Աֆղանստանի կամ Կոսովոյի միջազգային խաղաղապահ գործողություններում կողք կողքի ծառայելիս: ԱՄՆ նախագահ Դոնալդ Թրամփը, Փաշինյանին մաղթելով ամենայն բարիք, նշել է, որ անհամբերությամբ սպասում է բարեկամության ամրապնդմանն առաջիկա տարվա ընթացքում։
Ամերիկագետ Սուրեն Սարգսյանը 1or.am-ի հետ զրույցում անդրադառնալով ԱՄՆ նախագահի ուղերձին նշեց, որ Թրամփի ուղերձը վերաբերում է այս տարվա ընթացքում հարաբերությունների հնարավոր զարգացմանն ու խորացմանը, որը պայմանավորված է այն հանգամանքով, որ ավարտին է մոտենում ԱՄՆ նախագահ Թրամփի նախագահության ժամկետը:
Ուստի, չցանկանալով իրադարձություններից առաջ ընկնել, ցանկություն է հայտնել համագործակցել այս պահի դրությամբ:
«Որևէ այլ ակնարկ ես չեմ տեսնում, քանի որ շատ բաց տեքստով ամեն ինչ ասված է շնորհավորական ուղերձում թե՛ ներկա և թե՛ նախորդ տարիների համագործակցության տեսանկյունից, առաջնահերթությունը տալով Կոսովոյում և Աֆղանստանում Հայաստանի կողմից իրականացված խաղաղապահ առաքելությունների գործունեությանը: Այսինքն, ըստ էության ուղերձում որևէ նոր գործունեության մասին խոսք չի գնում»,- ասաց Ս. Սարգսյանը:
Հարցին, թե արդյո՞ք իր կարծիքով ներկայիս քաղաքական ղեկավարությունը բավարար քայլեր ձեռնարկում է հայ-ամերիկյան համագործակցության էլ ավելի խորացման համար, ամերիկագետը պատասխանեց.
«Հայաստանի կողմից քայլեր չկան, եթե նույնիսկ կան, ապա արդյունքից երևում է որ Հայաստանը գնում է Միացյալ Նահանգների հետ հարաբերությունները չխորացնելու ճանապարհով: Հոկտեմբերին նախատեսված է ՀՀ արտգործնախարարի այցը Վաշինգտոն և այդ այցի տրամաբանության շրջանակներում հնարավոր կլինի հասկանալ, թե Հայաստանն արդյո՞ք ցանկություն ունի որևէ նախաձեռնողական քաղաքականություն իրականացնելու և Միացյալ Նահանգերի և Թրամփի վարչակազմի հետ հարաբերությունները խորացնելու նպատակով, թե՞ սպասելու են Բայդենն ընտրվի և նրա հետ կզարգացնեն հարաբերությունները»:
