Գիտնականները կանխատեսել են կորոնավիրուսային համաճարակի ապագան
ՀԱՍԱՐԱԿՈՒԹՅՈՒՆ
Լիբանանում Բեյրութի ամերիկյան համալսարանի գիտնականները կանխատեսել են, որ նոր կորոնավիրուսային համաճարակ COVID-19-ն ապագայում կոլեկտիվ իմունիտետի ձևավորման դեպքում, բարեխառն կլիմա ունեցող երկրներում սեզոնային վարակ կդառնա: Այս մասին հաղորդվել է «Frontiers in Public Health» ամսագրում հրապարակված հոդվածում:
Հետազոտողները դիտարկել են հայտնի սեզոնային վարակները, ինչպիսիք են գրիպը և մրսածություն առաջացնող կորոնավիրուսները: Բարեխառն կլիմա ունեցող երկրներում հիվանդացությունը գագաթնակետին է հասնում ձմռանը, մինչդեռ արևադարձային շրջաններում վարակները շրջանառվում են ողջ տարվա ընթացքում: Գիտնականները դիտարկել են գործոնները, որոնք վերահսկում են վիրուսային վարակների սեզոնայնությունը՝ հաշվի առնելով SARS-CoV-2 համաճարակի վերաբերյալ տվյալները:
Պարզվել է, որ օդում և մակերևույթներին վարակների գոյունակությունը, դրանց հանդեպ ընկալունակությունը, ինչպես նաև կառույցներում հավաքվելու մարդկանց հակվածությունը կախված են ջերմաստիճանի և խոնավության սեզոնային փոփոխություններից: Գրիպի և այլ շնչառական հիվանդությունների համեմատությամբ՝ նոր կորոնավիրուսը մարդկանց մեծամասնության մոտ իմունիտետի բացակայության պատճառով ունի փոխանցման ավելի բարձր մակարդակ: Այդ իսկ պատճառով սեզոնայնության վրա ազդող գործոնները դեռևս չեն կարող ամառային ամիսներին կանգնեցնել COVID-19-ի տարածումը:
Վարակը սեզոնային գործոնների նկատմամբ ավելի ընկալունակ կդառնա միայն մարդկանց իմունիզացիայից կամ առողջանալուց հետո կայուն իմունիտետ ձեռք բերելու դեպքում: Իսկ մինչ այդ անհրաժեշտ է խստորեն պահպանել կանոնները՝ կորոնավիրուսային համաճարակի տարածումը սահմանափակելու համար:
Նյութը հրապարակման պատրաստեց Լիլիթ Ամիրաղյանը
