Գործատուի մոտ շահագրգռվածություն չկա աշխատավարձը չգրանցելու
ՀԱՍԱՐԱԿՈՒԹՅՈՒՆ
1or.am կայքի զրուցակիցը Իմ քայլը խմբակցության պատգամավոր Եղիշե Սողոմոնյանն է։
- Պարոն Սողոմոնյան, նախօրեին ԱԺ հանձնաժողովը հավանություն տվեց օրինագծին, որով հայրության արձակուրդի հնարավորություն է տրվում: Ինչո՞ւ նման նախաձեռնության անհրաժեշտություն առաջացավ։
— Անկեղծ ասած ես նիստին չեմ մասնակցել, դեռևս ծանոթ չեմ հեղինակի հիմնավորմանը, լիագումար նիստի ժամանակ կծանոթանամ մանրամասներին։ Նախագիծը տեսել եմ, ըստ էության, հավասար իրավունքների մասով, այն, որ ծնողները ևս պետք է հավասար իրավունքներ ունենան և երբեմն հարմար է լինում, որ հայրը ևս խնամք իրացնի և նման առաջարկ այդ պատճառով է արվում։ Ըստ էության, ընտանիքում ֆինանսական բեռը հայրերն են կրում, բայց երբեմն դեպքեր են լինում, որ ֆինանսապես մայրերը ավելի շատ են վաստակում և անհրաժեշտ է լինում, որ հայրը ես զբաղվի երեխայի խնամքով։
- Կա այնպիսի կարծիք, որ այս կարգավորման մեջ խոցելին այն է, որ աշխատողները հիմնականում իրենց իրական աշխատավարձով չեն գրանցված, հետևաբար հասանելիք չափով չեն ստանում արձակուրդի գումարը: Ինչպիսի՞ մեխանիզմներ պետք է գործեն, որ ընդհանրապես թե կնոջ, թե ամուսնու իրավունքները պաշտպանված լինեն այս տեսակետից:
— Հայաստանում 2015թ․ տեղի ունեցավ հարկային բարեփոխումներ և մենք այնպիսի հարկային դաշտ ստեղծեցինք, որ եթե գործատուն փաստացի գրանցում է աշխատողների աշխատավարձը դրանից ձևավորվող եկամտային հարկը հավասարազոր է այն օգուտին, որ ինքը կստանա շահույթահարկը պարտադիր վճարելու հետևանքով։ Հետևաբար գործատուի մոտ շահագրգռվածություն չկա աշխատավարձը չգրանցելու, որովհետև եթե չի գրանցում այդ դեպքում ավել շահույթահարկ է վճարում. իսկ երբ որ գրանցում է նույն գումարով եկամտահարկ է վճարում իսկ շահույթահարկ չի վճարում։ Գործող համակարգը այնպես է ստեղծվել, որ գործատուները չխուսափեն աշխատավարձի փաստացի մակարդակը ֆիքսելուց։ Բայց ամեն դեպքում դեռ հասարակության մեջ կարծրացած գործելակերպ կա բիզնեսի ոլորտում, բայց, կարծում եմ, արդեն սրամիտ գործատուները այն տոկոսը, որ ունեին ցածր գրանցված աշխատավարձ և միայն ավել եկամտահարկ էին վճարում պետք է գրանցեն փաստացի աշխատավարձը, որովհետև դրանից իրենք միայն վնաս էին կրում։
Սոնա Գիշյան
