5 արդյունավետ միջոց ընկճախտից ազատվելու և խնդրի կրկնությունը կանխելու համար
ՖՈՏՈ
Ընկճախտը (դեպրեսիա) բավական տարածված հիվանդություն է, սակայն շատ հաճախ հիվանդներն անգամ գլխի չեն ընկնում դրա մասին։ Որպես կանոն ընկճախտից ազատվելու համար հարկավոր է դիմել բժշկին, հատուկ թերապիա անցնել, իսկ անհրաժեշտության դեպքում ընդունել նաև դեղորայք, սակայն կան շատ պարզ ու արդյունավետ հնարքներ, որոնք կօգնեն մեղմել հիվանդության դրսևորումները, իսկ երբեմն էլ ինքնուրույն հաղթահարել այն առանց վտանգավոր դեղամիջոցների ընդունման։
Ձեր ուշադրությանն ենք ներկայացնում հինգ փորձված միջոց ընկճախտից ինքնուրույն ազատվելու համար։
Ֆիզիկական ակտիվություն
Առավոտյան թեթև մարմնամարզություն անելն ու երեկոյան մարզվելը հիանալի միջոց է ընկճախտից ազատվելու համար։ Ֆիզիկական ակտիվության շնորհիվ փոխվում է գլխուղեղի քիմիական կազմը, օրգանիզմի գործառույթները բարելավվում են, իսկ տրամադրությունը բարձրանում։ Հետազոտությունները ցույց են տվել, որ ոմանց համար մարզումներն ավելի արդյունավետ են, քան դեղորայքը։ Ընկճախտից ազատվելու համար առավել օգտակար են արագ քայլքը, վազքը, ուժային վարժությունները, ջրային աերոբիկան, լողն ու պարերը։ Հարկ է հիշել, որ վարժությունները պետք է հաճելի լինեն ու դրական հույզեր պարգևեն, այլ ոչ թե ուժասպառ անեն, ուստի կարելի է ամեն օր ոչ շատ բարդ վարժություններ անել կամ շաբաթական հինգ ժամ ինտենսիվ մարզվել։ Շատ ավելի լավ արդյունքի հասնելու համար կարելի է մարզվել մաքուր օդին։ Նման մարզումները ոչ միայն կազատեն ընկճախտից, այլև կկանխեն հետագայում նմանատիպ խնդրի կրկնությունը։
Հոգատար վերաբերմունք օրգանիզմի նկատմամբ
Հիվանդության ախտանշանների նկատմամբ ուշադիր լինելու համար մասնագետները խորհուրդ են տալիս յոգայով զբաղվել, մեդիտացիա անել ու շնչառական վարժություններ կատարել։ Շատ արդյունավետ կարող է լինել նաև օրագրում մտքերի ու հույզերի մասին գրելը։ Հարկ է հիշել, որ սեփական մտքերը վերահսկողության տակ պահելը շատ կարևոր է ներդաշնակության մեջ ապրելու համար, իսկ այս պարզ միջոցները թույլ կտան ավելի հանգիստ լինել ու ճիշտ դատողություններ անել։ Մտածողությունը շատ կարևոր դեր է խաղում ընկճախտի բուժման ու կանխարգելման հարցում, քանի որ այս խնդիրը շատ հաճախ պայմանավորված է լինում սթրեսի բարձր մակարդակով։ Սա է պատճառը, որ հարկավոր է անպայման կիրառել նմանատիպ մեթոդներ ֆիզիկական ու հոգեբանական լարվածությունից ազատվելու համար։
Հանգիստ
Հանգիստը նույնպես հիանալի միջոց է ընկճախտի դեմ պայքարի համար, ուստի հարկավոր է առաջին հերթին կարգավորել քունը։ Որակյալ քունը թույլ կտա կարգավորել հորմոնների մակարդակը, կբարելավի օրգանիզմի գործառույթներն ու էներգիա կհաղորդի։ Ընդ որում՝ հարկավոր է ամեն օր արթնանալ ու պառկել քնելու նույն ժամերին, քանի որ քնի ռեժիմը թույլ կտա ազատվել բացասական հույզերից։ Ավելին՝ առողջ քնի համար հարկավոր է սենյակում հնարավորինս թույլ լուսավորություն ապահովել, քնելուց առաջ առնվազն երկու ժամ խուսափել գաջեթներից ու հեռուստացույցից, չօգտագործել կոֆեին ու քնել ցածր ջերմաստիճանի պայմաններում։
Շփում
Ընկերների ու հարազատների հետ շփումը հիանալի միջոց է տրամադրության բարելավման համար։ Առհասարակ՝ սոցիալական կապերն ընկճախտի դեմ պայքարի լավագույն միջոցներից մեկն են։ Հարկ է հիշել, որ մարդն ունի մարդկանց կարիք, ուստի հարկավոր է միշտ կապի մեջ լինել հարազատների հետ ու հանարվորինս հաճախ հանդիպումներ կազմակերպել։
Բնություն
Ընկճախտից ազատվելու համար շատ արդյունավետ կարող է լինել նաև հանգիստը բնության գրկում։ Բանն այն է, որ բնության ձայները հանգստացնող ազդեցություն են ունենում մարդու վրա, մինչդեռ ժամանակակից աշխարհի աղմուկը խիստ բացասաբար է անդրադառնում մարդու հոգեվիճակի վրա, ինչն անմիջականորեն կապված է անհանգստության ու ընկճախտի հետ։ Հիվանդության տհաճ ախտանշաններից ազատվելու համար կարելի է զբոսնել անտառում, այցելել լողափ, այգեգործությամբ զբաղվել կամ պարզապես հաճելի ժամանակ անցկացնել մոտակա այգում։
