Ինչպե՞ս կանխարգելել վարիկոզը
ՖՈՏՈՎարիկոզն իրենից ներկայացնում է ոչ միայն աստղիկների տեսքով արյունատար անոթներ, այլև հիվանդություն, որը կարող է հանգեցնել ծանր հետևանքների: Բժիշկները վստահեցնում են, որ ավելի լավ է վարիկոզը կանխել, քան հետո երկար բուժել: «Комсомольская правда»-ի “Профилактика варикоза на ногах” հոդվածում լրագրող Յանա Բազեկինան և անոթային վիրաբույժ Դենիս Իբրահիմովը կանանց և տղամարդկանց համար ներկայացրել են վարիկոզի կանխարգելման ամենաարդյունավետ մեթոդները:
Ոտնաթաթերի մերսում
Վարիկոզի կանխարգելման ամենաարդյունավետ մեթոդներից մեկը ոտնաթաթերի մերսումն է: Այսպիսի մերսումն արդյունավետ է, հատկապես՝ հղիության շրջանում, երբ ծանր կշռի և այտուցների պատճառով ոտքերի երակները ենթարկվում են տևական ծանրաբեռնվածության: Մերսման շնորհիվ ոտքերում առաջանում է թեթևության և հանգստության զգացողություն:
Ոտնաթաթերի ճիշտ մերսման համար՝
- Քնելուց 30-40 րոպե առաջ ոտքերի վաննա ընդունեք: Տաք ջրին ավելացրեք ծովի աղ և մի քանի կաթիլ Ձեր սիրած եթերայուղը կամ որևէ բուսական թուրմ,
- Հարմարավետ նստեք ամուր մակերեսի վրա,
- Սկսեք տրորել մատների շրջանը՝ շարժվելով դեպի կրունկը: Սակայն, շատ մի՛ սեղմեք. Մերսումը չպետք է առաջացնի անհարմարության զգացում կամ ցավ,
- Հատուկ ուշադրություն դարձրեք ոտքերի մատներին. Սկսեք թեթև շոյանքներով և ավարտեք նուրբ ոլորումներով:
Անոթային վիրաբույժ Իբրահիմովը նշել է, որ ոտնաթաթերը պետք է մերսել մոտ 15-20 րոպե: Մերսումն ամեն երեկո անելու դեպքում՝ շուտով կնկատեք, որ ոտքերում առաջացել է թեթևություն, լարվածությունն անցել է: Դա կարող է բարելավել Ձեր ինքնազգացողությունը:
Սննդակարգում ներառեք հնարավորինս շատ միրգ և բանջարեղեն
Ճարպային բարձր կալորիականությամբ սննդի գերակայությունը հանգեցնում է ոչ միայն ավելորդ քաշի, այլև արյունատար անոթների հետ կապված խնդիրների: Ուստի, եթե չեք ցանկանում ձեռք բերել վարիկոզ կամ անոթային այլ հիվանդություններ, սննդակարգի անառողջ սնունդը փոխարինեք թարմ բանջարեղենով և մրգերով: Վերջիններս պարունակում են ֆլավոնոյիդներ, որոնք ամրացնում են արյունատար անոթների պատերը, կանխում բորբոքումները և բարելավում արյան շրջանառությունը:
Բժիշկ Իբրոհիմովը խորհուրդ է տալիս նախապատվությունը տալ կանաչ բանջարեղենին՝ սոխ, բրոկկոլի, սպանախ, կաղամբ: Բուլղարական պղպեղը նույնպես նպաստում է արյունատար անոթների պատերի ամրացմանը: Մրգերից նա առանձնացնում է ցիտրուսայինները՝ նարինջ, մանդարին, գրեյպֆրուտ, կիտրոն, պոմելո, ինչպես նաև կանաչ խնձոր ու խաղող:
Զբաղվեք բուժական ֆիզկուլտուրայով
Բժիշկը խորհուրդ է տալիս կատարել հետևյալ վարժությունները՝
- Սկզբում ոտնաթաթերը հերթով 15 անգամ պտտեք նախ աջ, ապա ձախ (կամ հակառակը) ուղղությամբ:
- Կանգնեք աջ ոտքի վրա, ձախ ոտքը ծնկի մասից ծալեք, և մատների վրա բարձրանալով՝ ձգեք ոտնաթաթը: Այս դիրքում մնացեք 5-10 վրկ, որից հետո կրկնեք նույնը՝ փոխելով ոտքերի դիրքերը: Վարժությունը պետք է կրկնել (յուրաքանչյուր ոտքի համար) 15 անգամ:
- Կանգնեք ոտքերի մատների վրա և սահուն իջեք: Վարժությունը կրկնեք 20 անգամ:
- Կանգնեք կրունկների վրա և սահուն իջեք: Կրկնեք 15 անգամ:
- Ճոճվեք ոտնաթաթերի վրա՝ կրունկներից դեպի մատները և հակառակը: Կրկնեք 15 անգամ:
- Ուսերի մակարդակով՝ ձեռքերով հենվեք պատին, բարձրացեք ոտքերի մատներին, ապա իջեք կրունկների վրա: Վարժությունը կրկնեք 15 անգամ:
- Նստեք անկողնու վրա, հերթով բարձրացեք ձախ, ապա աջ ոտքերի ծայրին, ապա կրունկներն իջեցրեք հատակին: Սա կրկնեք 15 անգամ:
Զբաղվեք լողով
Լողալիս մարմինը գտնվում է հորիզոնական դիրքում, որի ժամանակ արյունը չի կուտակվում ոտքերում, ավելին՝ արյան շրջանառությունը լավանում է: Լողի ընթացքում ջուրն իջեցնում է ճնշումը, թուլացնում մկանները և նպաստում այտուցների վերացմանը:
Նյութը հրապարակման պատրաստեց Լիլիթ Ամիրաղյանը:
