Ազատ ստեղծագործողների ինքնանույնականացման քայլերը սկսված են
ՀԱՍԱՐԱԿՈՒԹՅՈՒՆ
Պարզվում է` Հայաստանում ազատ ստեղծագործողների համար գործունեություն ծավալելն ու ազատորեն ինքնադրսևորվելը բավական բարդությունների է առնչվում: Խնդիրները շատ են, սակայն դրանց լուծմանն ուղղված պետական ինստիտուտների կողմից իրականացվող քայլեր՝ չկան: Ուստի, հասունացել է դրանց մասին ոչ միայն բարձրաձայնելու, այլև ստեղծված իրավիճակից դուրս գալու ելքեր փնտրելու և գտնելու ժամանակը:
«Մուզանավ» հասարակական կազմակերպության համահիմնադիր Լիլիթ Բլեյանը 1or.am-ի հետ զրույցում նշեց, որ «Ինքնանույնականացում - 2020» ազատ ստեղծագործողների համաժողով կազմակերպելու գաղափարը հասունացել է համավարակի ժամանակաշրջանում անկախ ստեղծագործողների կենսական կարիքները հոգալու հնարավորությունից զրկված լինելու և իրենց խնդիրների հետ միայնակ մնալու պատճառով:
«Պետությունը փակեց բազմաթիվ դռներ` չբացելով անկախ ստեղծագործողների համար որևէ դուռ: Կազմակերպությունը մենք գրանցել էինք մինչև երկրում կարանտինային ռեժիմ հայտարարելը, և դադարի այս ընթացքը ցույց տվեց, որ ճիշտ ժամանակն է մեր խնդիրների մասին բարձրաձայնելու համար, քանի որ տարիներ շարունակ թեև տարբեր առիթներով փոքրիկ շրջանակներում դրանք քննարկել ենք, բայց որևէ քայլ չենք ձեռնարկել: Եվ հիմա եկել է այդ խնդիրները հնարավորինս համակարգված կերպով ներկայացնելու և լուծումներ գտնելու ժամանակը»,- ասաց Լ. Բլեյանը:
Քննարկումներին մասնակցած մշակույթի ամենատարբեր ոլորտների ազատ ստեղծագործողները հանգել են այն եզրակացության, որ առկա խնդիրների լուծման ամենակարճ ու հեշտ ճանապարհը կուսակված ասելիքը համագործակցային միջավայրում քննարկելն ու դրանց լուծումներն առաջարկելը կարող է լինել:
«Ասելիքը պետք է գործ դառնա: Մենք երկար սպասել ենք, որ պետությունն այն նախաձեռնի, սակայն համավարակը եկավ ապացուցելու, որ սպասելն անիմաստ է, քանի որ ամեն ինչ շարունակում է ընթանալ իներցիայի ուժով: Մենք ուզում ենք հստակ քայլերի շարք առաջարկել, որոնք, գոնե մեր համոզմամբ, կհանգեցնեն փոփոխությունների: Նոր հեծանիվ չենք հորինելու, ուսումնասիրել ենք ոչ միայն միջազգային փորձը, այլև Հայաստանի հնարավորություններին ադապտացնելու հնարավորությունները: Այդ է պատճառը, որ ասելիք ունեցող բոլոր մարդկանց հնարավորություն ենք տալու արտահայտվելու այն խնդիրների շուրջ, որոնք կան»,- ասաց կազմակերպության ղեկավարը:
Խոսելով համաժողովի անվան մասին՝ Լ. Բլեյանը նշեց, որ միտքը ծնվել է ԱԺ նիստերից մեկի ժամանակ ազատ ստեղծագործողների խնդիրների մասին ԿԳՄՍ նախարարին ուղղված հարցից, որին ի պատասխան Ա. Հարությունյանը պատասխանել էր, թե պետությունը դժվարանում է նրանց նույնականացնել, քանի որ չկա այնպիսի բազա, որտեղ գրանցված լինեն բոլոր ազատ արվեստագետները:
«Այդ ժամանակ թեև խնդիրը ֆիքսվեց, բայց տրամաբանությունը պահանջում էր, որ այդ ուղղությամբ քայլեր արվեին, սակայն մինչ այս պահը գերատեսչության կողմից որևէ քայլ կա՛մ չի իրականացվել, կա՛մ իրականացվել է այն դանդաղությամբ, որ դրա արդյունավետությունն այլևս համոզիչ չի կարող լինել: Այդ իսկ պատճառով որոշեցինք օգնել իրենց, նախ ցույց տալ, որ մենք կանք, և երկրորդ՝ որ ինքներս կարող ենք նույնականացնել այդ խնդիրները և առաջարկել դրանց լուծումները»,- ասաց Լ. Բլեյանը:
Նշենք նաև, որ համաժողովին կմասնակցեն արվեստի տարբեր բնագավառները ներկայացնող ստեղծագործողներ: Այն տեղի կունենա Հրազդան քաղաքի Շառլ Ազնավուրի անվան զբոսայգում: Բոլոր նրանց համար, ովքեր տրանսպորտի կարիք կունենան, Երևանից ժամը 12։00-ին դեպի Հրազդան կշարժվեն միկրոավտոբուսներ: Տեխնիկական բոլոր հարցերով կարող եք կապ հաստատել [email protected] հասցեով։
Ֆրիդա Ղազարյան
